Vawiin khan Swachh Bharat Mission (Urban) hnuaia hma lakna peng pakhat atan UD&PA Lawngtlai District chuan Lawngtlai khawpui chhunga veng hrang hrang hnenah bawlhhlawh bawm lian leh tha chi an hlan.
Bawlhhlawh bawm hlanna inkhawm hi Lawngtlai Bawrhsap Dr Arun T., IAS chuan kaihruaiin, faina chu tan rualna leh tha thlah lova beihna kal tlanga neih theih chauh a nih thu a sawi a. Khuallian, Lawngtlai East bialtu MLA Pu H. Zothangliana chuan Lawngtlaiin faina kawnga hma a sawn theih nana thawktute hma lakna chu fakawm a tih thu leh, SBM hnuaia bawlhhlawh bawm sem hmasa ber District an ni thei chu lawmawm a tih thu a sawi a. Faina kawnga hma laknaah chuan a theihna apianga tel ve zel a inhuam thu a sawi bawk.
Khual zahawm, LADC CEM Pu T. Zakunga pawhin Lawngtlai khawpui chu faina kawngah chak takin a tlan mek a ni tih hmuh theiha a lan thu sawiin, mipui pawh an harh chho mek a ni, a ti a. Bawlhhlawh bawm sem chu a nihna tur taka tangkai taka hman a nih a, uluk taka enkawl zui a nih a beisei thu a sawi.
Bawlhhlawh bawmte hi Lawngtlai khawpui chhunga VC 12 te hnenah panga theuhvin sem a ni a. Hei bakah hian, faina kawnga hma la tha zual veng pali te hnenah panga theuh pek belh an ni a. LADC leh Lawngtlai BDO office te pawh bawlhhlawh bawm hi pek an ni ve bawk.
