Champhai a lut leh chhuak bungraw phur lirthei-ten tlan velten Champhai panna kawngpui an rahchhiat nasat lutuk vang leh Champhai leilet zawl, buhbal chinna hmun a chenna in leh bungraw dahna Kudam sak mekte chu dan phalloh anih ang a khuah khirh anih theihna turin vawiin khan DC Conference Hall-ah Additional DC Pi Lalsangpuii Hmar kaihhruaiin District Level Meeting neih a ni.
Lirthei lut leh chhuak phurh rih dan turah vawiin a thukhawm hian bithliah siamin, Lirthei ke 6 nei tan Kg 9450, chu chu motor body feet 4.5 a sang, Lirthei ke 10 nei tan Kg 12600, chu chu motor body feet 4.5 a sang, Lirthei ke 12 nei tan Kg 17100 (motor body feet 5.5 a sang) nise a ti a. Hemi chungchanga hmala zui tur leh lirthei phurh rih dan lo enfiah tur hian Mizoram Police leh District Legal Metrology te ruat an ni a. District chhung kawngpui kam khawtin a VC leh YMA-te chu a tul anga lo puibawm tura ruat an ni a. Lirthei phurh tawk tura ruat aia tam bungrua phurh anih chuan bituk aia tam bungraw chin zawng chu hlan thlak nghal tur a ni. Kawngpui chhia te chak zawka cheithat anih theih nan leh kawngpui tihchhiat a nep theih nan Sumdawngtute, bungraw neitute leh lirthei neitute hnenah pawh ngenna siam nise ti a rel a ni a. Hetih rualin Champhai khawpui chhung National Highway-in a huam chin bak inkalpawhna kawngpui (Internal Road) humhalh turin khawpui chhung Village Council leh YMA Branch tinte ruat an ni bawk.
Sorkar thuchhuak Notification No. 1RR-80/73 (A) Date 14th April, 1989 in Champhai Town (khawpui) a a puan ang a, Champhai zawl leilet hmun chu Town huam chhungah telh ve anih lohna leh Town huamchhunga sorkar-in a puan ve loh avangin Champhai Leilet zawlah chenna tur in sak leh Godown emaw atan a in sak te phal a ni lova. Mizoram Revenue dan (The Mizoram Revenue Laws) 10(6) leh 11(1)-na in a sawi leh tarlan, Agricultural LSC, Periodic Patta and Gaden Pass te chu pass pek anihna ang taka Agriculture (Huan thlai siamna) atan ni lova, thil dan atan hman khapna Champhai District Magistrate-in a chhuah a.
He khapna thupek-ah hian Champhai leilet zawl, Agriculture kaihhnawih atana ram neiten pek an nih chhan ang taka hmang tur leh Godown sak leh chenna atana Insak te a khap tlat a. Godown sak mek leh sak tawhte endikin, ram pek an nih chhan anga hmang lo chu Mizoram Revenue dan (The Mizoram Revenue Laws) 11(8 tlawhchhanin; thiat tura hriattir vek an ni a. Sa mekte pawh an hnathawh chawlhsan tura hriattir nghal an nih bakah he khapna thupek zawm lova, tiluite chu chawitir emaw an pass cancel sak thlenga hrem theih tur annih thu meeting-ah hian tarlan a ni.
District Magistrate in dan dinglai tlawhchhan a khapna thupek chhuah hi chak taka kenkawh anih theihna tur leh tih hlawhtlin anih ngei theih nan Dan leh thupek kengkawhtute puibawm turin Task Force a din nghal bawk a ni.
