Vawiin khan NEDP bultuma Information and Public Relations Department (I&PR) buatsaih Press Study Tour nei tura lokal MJA Lunglei District member-te chuan Champhai District chhunga sawrkar hmalakna hrang hrangte leh pipute sulhnu pawimawhte tlawh kualin zirchianna an nei.

MJA Lunglei District member-te hian tukin zing khan Champhai Tlangsam Winery an tlawha, hruaitu ten lo dawngsawngin  inkawmhona hun tha tak an nei a.  Hemi hnu hian Zotlang Sports Stadium an tlawh leh a, World Bank sum hmanga Indo-Myanmar Road siam mekte, Composite Land Custom Station, Department of Trade and Commerce, Zokhawthara mite tlawhin Indo-Myanmar Trade zirchianna an nei a. Hemi bakah hian pipute sulhnu pawimawh tak Rih Dil an tlawh tel bawk a ni.

Press Study Tour team-te hian nimin  lamah  Khawbung RD Block huam chhunga pipu sulhnu pawimawh tak tak Kawtchhuah ropui, Lianchhiari lunglen tlang leh Hla kungpui mualte an tlawh a. Mizorama khaw fai ber Biate pawh tlawhin khawtlang hruaitute nen inkawmna hun tha tak an nei bawk a ni. Heng an fan kualnaah hian mithiamte leh khawtual mite puihnain zirchianna leh zir hona hun hlawk thlak tak an hmang a ni.

Pi C.Lalremruati, DIPRO Lunglei kaihhruaina hnuaia lokal NEDP Press Study Tour member-te  chuan sawrkar hmalaknaa Press Study Tour leh Project Site Visit neih a ni chu hlawkthlak an tiin hemi programme buatsaihtu sawrkar hnenah lawmthu an sawi a. An kalna hmun apianga khawtlang hruaitute lo dawnsawn danah lawmthu an sawi bawk a ni.

NEDP Press Study Tour team-te hian naktuk zingah  Champhai chhuah sanin Lunglei lam an pan leh tawh dawn a ni.