November ni 28, 2018-a Mizoram State Legislative Assembly inthlan neih zawh taka vote tlate chu kar leh thawhlehni, December ni 11 hian chhiar a ni dawn a. Hemia Lawngtlai District chhunga assembly bial pathuma vote tlate chhiar tura ruatte chu vawiin khan DC Conference Hall, Lawngtlaiah vote chhiar dan tur zirtir an ni.

Vawiina vote chhiar dan inzirtirna buatsaihah hian Lawngtlai District chhunga assembly bial pathum, Tuichawng, Lawngtlai West leh Lawngtlai East constituency-a vote tlate chhiar tura ruat Counting Supervisor 31 leh Counting Assistant 28 te bakah, Micro Observer 36 an tel a. Deputy District Election Officer, Lawngtlai East bial Returning Officer ni bawk Dr Andrew H. Vanlaldika leh Tuichawng Constituency-a Returning Officer Pu R. Lalremsanga te'n kal khawmte chu vote chhiar nana hriat tur pawimawhte an zirtir a ni.

Lawngtlai District chhunga assembly bial pathuma vote tlate hi Govt Lawngtlai College-ah constituency pathum tan a hran theuhvin counting hall siam a ni a. Constituency pathumah hian polling station 161 awmin, polling station 59 awmna Tuichawng bial counting hall-ah vote chhiarna tur dawhkan 12 hun a ni a. Polling station 68 awmna Lawngtlai West bial counting hall-ah dawhkan 14 hun niin, polling station 34 awmna Lawngtlai East bial counting hall-ah dawhkan 10 hun a ni bawk. December ni 11 zing dar 8-ah vote hi chhiar tan tura ruahman niin, polling station-a vote tlate chhiar a nih hmain postal ballot chhiar hmasak a ni ang.