July ni 3, 2018 a chatuan ram pan ta Kolasib Nitin Chanchinbu ‘DUHLAI’ Editor Pu C.Thanmawia chu vawiin khan Kolasib I&PR Office ah a Ral.


He hunah hian Pu David L.Thangliana, Director I&PR Department chuan Pu C Thanmawia chu mi kawm nuam tak leh rual pawl thiam tak a ni tiin a ui thu a sawi a, Pu C Thanmawia chhungte chu harsatna an tawh na ah te Sawrkar (I&PR) in puih theih an neih chuan inthlahrung lova hrilhre thin turin a chah bawk a ni. Mizoram Sawrkar hnuaia I&PR Department leh Mizoram Journalists’ Association te thawhhona tha tak  chu Hmarchhak bialah pawh thil chhinchhiah tlak tak a ni a, thil chhunzawm chi tak ani tiin Sawrkar chuan Journalists te welfare a ngai pawimawh a kawng hrang hrangin hmasawnna tur pawh an dap zel dawn ani a ti.


Pu David L Thangliana chuan Journalists’ te chu Mipui rawngbawltu an ni a, Ram tana thawk an nih angin thil zirchian peih a ngai a, Mipuite rin ngam Journalist nih a pawimawh a ni a ti. Thil chhuah tur reng reng chu finfiahna tha tak an neih a pawimawh a, fin fiahna neih hnu a chanchinbu a chhuah hian mipuite beng ah a tla na bik a, Mipuite Rin pawh an hlawh thin a ni a ti.


He hun hmanpuitu Pu Zonunsanga Khiangte, President HeadQuarters, MJA pawhin thu sawiin MJA leh Journalists te Nodal Department I&PR chuan thawhhona tha tak an neih thu a tarlang a, an thlamuanpui thu sawiin mamawh leh harsatna hrang hrang an neih pawhin Nodal Department ah an thlen mai thin a, thlamuang takin an lo ngaichang mai thin a ni a ti. MJA President chuan Sawrkar ina Journalists’ te hamthatna leh puihbawm an ngaihna kawng hrang hrang (Journalists Welfare) te a ngaituahin Journalists te a ngaihsak na kawngah lawmthu a sawi bawk a ni.


Pu R Lalhmingthanga, President MJA Kolasib District pawhin thu sawiin Sawrkar ina Journalists te a ngaihsak na kawngah lawmthu sawiin MJA Headquarters hotuten kawng tin renga an ngaihsakna ah pawh Kolasib MJA member te aiawhin lawmthu a hrilh bawk a ni.


Pu C Thanmawi Ral na hunah hian I&PR Director, MJA Hqrs Presdent bakah, IPRO Pu Andrew H Lalremruata, MJA HQrs Treasurer Pu Lalremsiama, MJA HQrs General Secretary Pu C.Lalhmachhuana leh Chanchinbu mi dangte an kalkhawm a. Information & Public Relations Director Pu David L Thangliana chuan Pu C.Thanmawia Ral na (Ex-Gratia) sum Fai cheng nuaikhat singnga (1,50,000/-) chu Pu C Thanmawia nupui Pi R Lalramthangi kutah a hlan a ni.