Vawiin khan Lawngtlaia Central YLA Hall-ah World Vision India (WVI) Chhimtuipui Area Development Programme (CADP) hma lakna hnuaia Lawngtlai leh Lunglei district-tea hmeichhe intanpui tawn pawl (women self help group) hlawhtlinna lawmna leh group ti thate chawimawina hun hman a ni a. Lawngtlai Bawrhsap Pu N. Chakhai MCS chuan khuallian niin a hmanpui.

Lawngtlai Bawrhsap chuan chhim lamah self help group (SHG) tha tak tak a awm chu lawmawm a tih thu sawiin, Mizoram-ah duhthusamin SHG hi kan la hlawhtlinpui lo zawk a, kan inzir chho zel ang a, kan la hlawhtlinpui dawn chauh a ni, a ti a. Chumi atana bul lo tan hmasate chu an chhuanawmin fak an phu hle a ni, a ti. Hmeichhiate'n SHG hmanga chhungkua leh khawtlang hma sawnna hna an thawh chu a ropui a, hmeichhiate hian kan theihna kan hriat chian a tha a, nasa leh zuala hma sawn turin taima leh rinawm takin hna kan thawk tur a ni, a ti a. KMMTTP avangin nakin lawkah kan kawtkaiah sumdawnna kawtchhuah a la rawn inhawng dawn a, chumi hmachhawn thei tur chuan tun a?anga lo inbuatsaih a tul a ni, a ti bawk.

Vawiina hun hmanah hian women self help group project atana tha thawhtu hrang hrang - NABARD, Mizoram Rural Bank, State Bank of India leh WVI official-te bakah, Lawngtlai leh Lunglei district-a SHG hrang hrang leh Lawngtlaia tlawmngai pawl ai awhte an kal khawm a. WVI CADP-a Special Projects Co-ordinator Pu HL Rinawma'n hun kaihruaiin, LIKBK AGS Rev. TH Vanlalzauva'n hunserh a hmang a. NABARD-a District Development Manager Pu Evan T. Munsong chuan inlawmna thu sawiin, WVI CADP-a Programme Manager Pu Paul T. Touthang chuan SHG Project report tlangpui a sawi a. NABARD Regional Office Aizawl-a Deputy General Manager Pu V.R. Nag, WVI Programme Director Pu Y. Devasahayam, MRB Lawngtlai Branch Manager Pu C. Lalrokima leh SBI Lawngtlai Branch Manager Pu Lalfakawma te paw'n thu sawiin, WVI Guwahati PMO-a Associate Director Pu Samuel Therieh chuan lawm thu a sawi a. Khuallianin WSHG documentary a tlangzarh bakah, Lawngtlai leh Lunglei district a?anga SHG ti ?ha zual panga ve ve hnenah chawimawina hlan a ni bawk.

National Bank for Agriculture and Rural Development (NABARD)-in SHG Project a ruahman hnuaiah kum 2012 atang khan Mizorama district pahnih Lawngtlai leh Lunglei district-ah te hian hma lak chhoh a ni a. WVI CADP hi nodal agency atan hman niin, MRB leh SBI te nen thawk hovin hmeichhiate'n SHG hmanga hma an sawn theih nan nasa takin an ?anpui thin a. Bul ?anna tur kawhhmuhin, training te an pe a, an bul tan nan leh than chhoh zel nan bank loan te pawh pek thin an ni a. SHG tam tak chuan an tangkaipui hle a ni.

He project hnuaiah hian Lunglei District-ah SHG 850 leh Lawngtlai District-ah SHG 600, a vaiin SHG 1450 din tuma hma lak a ni a. Chu an target chu khumin, tunah hian Lunglei District-ah SHG 898 leh Lawngtlai District-ah SHG 702, a vaiin SHG 1600 din a ni tawh a. He'ng zinga group 292 chu loan pek tawh niin, pek mai tur 150 an awm bawk a. A zavaia loan pek chhuah tawh zat hi cheng nuai 224.35 a ni.