Pu K Lalthawmmawia IAS ,Secretary to the Governor of Mizoram chuan vawiin khan Ramhlun Indoor Stadium-ah 17th  Mizoram Higher Secondary School Games ,2018 kharna hun a hmanpui a. Lawmman te a sem nghal  a ni.

School Education Department in an buatsaih  he school games-ah hian khuallian Pu K Lalthawmmawia chuan thu sawiin hetiang School Games buatsaih hautak dan a hriatpui tawh thin thu sawiin a langsar leh langsar lova thawktu leh buatsaih tute inpek naah fakin  Sports hlawhtling taka neih zawh a ni chu lawmawm a tih thu a sawi.

Sports neih hlutna hrang hrang sawiin Pu K Lalthawmmawia chuan infiamna hian hringnun ah leh taksa sawizawi naah tangkaina tam tak an nei a, rualkawmnan te, mahni inthununnaah te hriselna leh a dang tam tak ah te an that thu a sawi a.Thawhrimna,tumruhna leh taimakna te hi a keng tel vek a ni a ti  a. Pawimawh berah erawh chuan Lehkha zir a tha a, chu chu  Ram leh Hnam humhalh nan pawh a tangkai ber a ni a ti.

Vawiin programme  Pu K.Laldingliana, Director of School Education kaihhruai ah hian Pu Vanlalsawma, PEO & Organising Secretary in report a pe a, Khuallian hian Sport lawmman te sem nghal in Pu C.Hrangthuama, Joint Director of School Education & Organising Vice Chairman chuan hun tawpah lawmthu a sawi a ni.

17th Mizoram Higher Secondary School games, 2018 hi Aizawl infiamna hmun hrang hrangah ni 4 atanga ni 7, December, 2018 chhung hian neih niin heng Athletics, Badminton, Basketball, Football, Table Tennis, Taekwondo leh Volleyball ah te inelna neih a ni a, a pumpuiah Govt. Mizo Higher Secondary School chu pakhatna an ni.