Vawiin khan SP Office Conference Hall Mamit-ah kan hmalawka Krismas leh Kumthar lo thleng tur, mipuite'n hlim leh thlamuang taka an hman theihna turin dan leh thupek kenkawh dan tur sawiho a ni a. He hun hi Pu C. Vanlalvena, MPS, Addl. SP Mamit-in a kaihhruai.

Pu Shashank Jaiswal, IPS, SP Mamit chuan Krismas leh Kumthar hlim tak leh thlamuang taka hman a nih theih nan Mamit khawpui chhunga khawtlang hruaitute leh tlawmngai pawl hrang hrang hruaitute chu thawhhopuiah sawmin ruihhlo zuartute man an nih theihna turin mi tupawhin Police-te an tanpui theih thu leh ruihhlo zuar hria chuan Office a report kher lo pawhin ama mobile Phone kaltlang pawha hriattirna pe turin kalkhawmte a ngen a. Krismas leh Kumthar vuakveta veng hrang hranga YMA Duty turte chu Rs 2000/- theuha a tanpui tur thu a sawi bawk.

Vawiin thutkhawmah hian Krismas leh Kumthar vuakveta halpuah leh halmawi, silai lem a mu nei chi bakah ruihhlo hrang hrang zu, Drugs, Ganja etc khuahkhirh dan tur kawng hrang hrang sawiho a ni a. Branch hrang hrang YMA Duty indah dan turte bakah mipuite him tlanna turin khawpui chhung hmun hrang hrangah CCTV Camera dah chungchangte, Traffic chungchang leh khawtlang ralmuanna tur thil pawimawh dang hrang hrang sawiho a ni bawk.

Vawiin Krismas leh Kumthar vuakveta dan leh thupek kenkawh dan tur sawihona-ah hian Mamit Police Department-a thawktute SDPO, RO, OC leh Mamit khawpui chhunga khawtlang hruaitute leh tlawmngaipawl hrang hrang hruaitute bakah thutharthehdarhtute an tel a ni.