Vawiin chawhma dar 11:00Am khan Pu Zoengsanga, DEO leh District Bawrhsap ni bawk  office chamber-ah  DEO leh Political Party hrang hrang aiawh te leh Independent  Candidate  te chuan Vote chhiar Ni tura atan a inbuatsaih dan  leh ruahhmanna kalpui mek  thlir hovin meeting an nei a ni.

Pu Zoengsanga chuan MLA inthlan puan hma atang tawhin MLA inthlanna atan hian  inpuahchahna chak taka kalpui tawh a ni a. He mi chhung zawnga hian  Political Party te witness-na hnuaia thil tihtur tam tak a awm a. Zing leh zan pawh sawi lova, kan koh hun apianga in lo kal a,  min tawiawm tlat thinna  zarah MLA inthlan pawh boruak muanawm tak hnuaiah tluang takin vote pawh kan thlak thei a, in chungah kei leh ka thawhpui te hi kan  lawm takzet a ni, a ti.

Pu Zoengsanga chuan MLA inthlanna atan hian mawhphurhna  chanvo hrang hrang hrang chang ten mahni duty theuh ngai pawimawha, thahnem ngai taka hna an thawh theuh vanga hlawhtling taka POLL DAY pawh hmachhawn theih kan ni a.  Kan inthlanna felfai zia leh muanawm zia te, complaint pakhat te mah lut a awm lo te an han  hmuh hian kan Observer te pawn mak an ti hial a, kan District hi min ngaisan phah sawt ka ring a ni, a ti. Siaha District mipui ten dan leh hrai kan zawm thatzia leh India   khua leh tui tha kan nihzia pawh he kan MLA inthlannaa kan nunphung hian a pholang  chiang hle a ni, a ti bawk.

Vawiin meeting-ah hian tarik ni 11.12.2018  a vote chhiar dan tur te, security arrangements chungchang te, Candidate leh Political party  agent te hriattur pawimawh te leh thil pawimawh hrang huangzau taka sawihova, inhrilhhriat a ni.

 Meeting zawh ve leh hian vote chhiarna hmun tur Government Siaha College-ah  kal nghalin,  Counting Hall te,  Security arrangement te leh inpuahchahna hrang hrang kalpui mek chu DEO leh Party aiawh kalkhawm te chuan an thlir ho nghal a ni.

Political Party hrang hrang aiawh kalkhawm te pawhin DEO leh a thawhpui ten Vote chhiar ni tur atana an inbuatsaihna leh ruahmanna kalpui dan chu tha an ti thu sawiin,  boruak muanawm tak hnuaia  Inthlanna felfai tak min neihpui theih avangin DEO leh a  thawhpui te chungah rilru leh thinlung takin lawmthu kan sawi tak meuh a ni, an ti bawk .

 Pu Zoengsanga, DEO hi  Pu James Lalnunmawia, RO to Saiha AC & Palak AC, Pu F.Lalbiakzaua, Addl.SP, Pu Albert Lalnuntluanga,DSP Hqrs leh  Pu N.Vabeiratlua, DIPRO ten an tawiawm a ni.