Vawiin khan Ministry of Human Resource Development hnuaia Department of School Education and Literacy enkawltu Secretary Pi Rina Ray hovin Aijal Club Conference Hall ah Education Officer ten meeting an nei.

Pi Rina Roy chuan zirna tihhmasawnna tura hmalakna hrang hrangte thuang thuma thenin ruhrel din leh hmanraw lakkhawm te, Central leh State Education Board changtlung taka siam leh zirlaiten an zirtur bituk an thiam ngei em tih endik ‘learning outcome’ chungchang a sawi a. Mizoram chauh nilo India ram pumin zirna kawnga hmasawn a mamawhna lai ber chu zirlaibu vawn (text book memorize) ringawt lova naupangin ngaihtuahna fing tak an hman thiam theihna tura zirlaite zirtir leh chutiang ang hawi zawnga exam zawhna siam thiam a tul nia a hriat thu a sawi. School tina Principal te leh anmahni enkawltu department inkara inbiakpawhna rang leh changtlung zawk awm tul a tih thu sawiin MHRD Secretary Pi Rina Roy chuan sawrkar laipui atanga hmalakna thar awmte leh State hmalakna te rang taka Principal zawng zawngin an lo hriat theihna tur te, heng hmalakna thar an bawhzui dan te leh an school dinhmun dik tak rang taka hre thei turin tunlai thiamna hman tangkai tul a tih thu a sawi bawk.

Meeting hi School Education Department Secretary Pi Esther Lalruatkimi'n a kaihruai a. Pi Esther Lalruatkimi hian Mizorama zirna lo intan dan leh hma kan sawn dan te tarlangin State naupang tak ni chungin Mizoram chuan zirna lamah hma a sawn hle a, India ram state te zingah ziak leh chhiar thiam tamna ber pahnihna a nih thu a sawi a. Hetihlai hian hmasawnna tur erawh kan la ngahzia sawiin Pi Esther Lalruatkimi chuan Maths, Science leh English-ah zirlaite an chaklo a, state dang zirlai te el phak tura tan lak kan la mamawhzia a sawi bawk a ni.

Mizorama zirna dinhmun tlangpui leh Centrally Sponsored Scheme bawhzui a nih dan te Powerpoint hmangin Addl. Director of School Education Pu Laldingliana chuan a sawifiah a. Hmalakna hrang hrang a tarlan zingah a bik takin sports leh football-a Mizoram hmalakna fakawm a tih thu Pi Rina Roy hian a sawi.

Vawiin meeting-ah hian Education Department hotute bakah MBSE leh SCERT officer-te, teachers association hrang hrang hruaitute an tel a ni.