No.2003/2020-2020 


Lawngtlai, Nikir thla ni 13, 2020: Vawiin khan Lawngtlai Blood Bank leh Association for Voluntary Blood Donation (AVBD), Lawngtlai te tang kawp buatsaihin Baptist Church of Mizoram, Lawngtlai Electric Veng kohhran hall-ah World Blood Donor Day 2020 pualin hun hman a ni a. Ṭhalai Kristian Pawl, Electric Veng Unit Lawngtlai te nen a thlawna thisen pek runpui buatsaih nghal a ni.

WBDD puala hun hman hi AVBD Lawngtlai President Pu Elvis Lalthangzuala'n kaihruaiin, Blood Bank-a thisen dah khawl chu a mamawhte'n a hun taka thisen an dawn theihna a nih avangin voluntary-a thisen pek uar sauh sauh turin thalai kal khawmte chu a sawm a. MTKP Executive Committee Member Pu Lalhriatpuia'n hunserh hmangin, thisen pek chu Kristian thalaite tiha mawi leh pe tam tura inel chu inelna thianghlim a nih thu a sawi.

Nikum June ni 14 leh kumin June ni 14 inkara pawl leh kohhran anga thisen pe tha zual pathum - GRHSS NSS Unit Lawngtlai (unit 116), TKP Thingfal Pastor Bial (unit 63) & LIKBKTP Vengpui-Bazar Bial (unit 62) te hnenah AVBD hmingin chawimawina thuziak hlan a ni a. Blood Bank Officer Dr K. Beiparysa chuan hlanin, thisen pek dan tur leh hriat tur pawimawh te a sawi zui nghal a. Thisen pek chhunzawm a ni.

Kum tin June ni 14-ah World Blood Donor Day hi hman thin a ni a. Kumin hi Pathiannia a tlak avangin vawiin khan hman a ni a. Lawngtlai Area Thalai Kristian Pawl-in Lawngtlai khawpui chhung leh khaw hnai zuala Bial leh Unit TKP-te'n thisen an inpek chhawk dan tur a ruahmanah TKP Electric Veng Unit te pek thla a nih angin hemi ni pual hian thisen pek runpui hi buatsaih nghal a ni.

Vawiina thisen pek runpui buatsaihah hian TKP Electric Veng Unit Lawngtlai chuan thisen unit 29 an pe a. Thisen petute hi mipa 25 leh hmeichhia 4 an ni.

Kumin World Blood Donor Day thupui atan hian "Safe Blood Saves Life" (Nun chhan nan thisen thianghlim) tih hman a ni a. Kum 2019 June ni 14 atanga kum 2020 June ni 13 inkar chhungin Lawngtlaiah blood donation camp vawi 38 buatsaih niin, thisen unit 806 lak a ni.

Attachment

  • Loading attachment...