No.2002/2020-2020 

Vawiin khan Lunglei District Level Task Force on Covid-19 te chu DLTF Chairman, Lunglei Bawrhsap Pu V. Lalsangliana, IAS hovin DC Conference Hall-ah an thu khawm a. COVID-19 hri leng darh zel tur khuahkhirh a nih theih nana Lunglei District chhunga inkharkhip kalpui chhunzawm dan tur an sawi ho.

DLTF meeting chuan Lunglei khawpui chhungah dawr leh sumdawnna hmun hawn khap kalpui mek chu 20th June, 2020 (Saturday) thleng kalpui chhunzawm ni se tih a rel a. He khapna hian mihring leh ran damdawi dawrte a huam lovang. Zirna in, training institute leh sakhaw biakna hmunte chu khar chhunzawm zel a ni ang. Amaherawhchu, hei hian an administrative office hna pangngai kalpui erawh a huam lovang. Lunglei khawpui chhung leh Deputy Commissioner - in containment Area-a a puante atanga luh leh chhuah (zin veivah) khap a ni. Tin, Lunglei khawpui chhung leh Deputy Commissioner-in Containment Area-a a puanah te chuan lirthei hmanga mipui chetvel khap tlat a ni. Inneih inkhawm leh mitthi vuinaah mi 35 aia tam pun khawm khap a ni. Hei hi kohhran leh khawtlang hruaituten khauh taka kalpui tura beisei an ni. 

Tin, Lunglei khawpui chhungah leh Deputy Commissioner - in containment area-a a puanah te phalna neilo chu tumahin mahni in leh compound an chhuahsan tur a ni lo. Tul bik thil - chhiat tawh, damloh etc a chhuak tur te chuan VLTF phalna an la tur a ni. Lunglei District chhungah tlai dar 7:30 atanga zing dar 4:30 inkarah pawn chhuah khap tlat a ni. Vantlang hmun - dawr, office, damdawiin a kalte chu metre 2 (hnih) tala inhlata awm tur a ni. 

Mizorama lo lut reng reng chu Sawrkar/Community Quarantine Centre-ah ni 21 emaw Sawrkarin a bituk hun chhunga an aw manga, hemi chhung hian Health Department-in RT-PCR test an ti ang. Home Quarantine phal a ni lo. Lunglei CMO Dr Thani Pachuau-in report pein Lunglei District-ah Swab Sample 929 lak tawh niin RT-PCR result 434 hmuh tawh a ni a, result 495 la nghah mek a ni. Result hmuh tawh ah Covid-19 positive mi 45 awmin contact tracing vawiinah zawh fel beisei anih thu Lunglei CMO hian a tarlang bawk. Lunglei District medical staff-te an indaihloh hle thu pawh sawiin NHM hmalaknain nurse pahnih, laboratory technician pakhat leh data entry operator pakhat neih belh anih dawn bakah Lunglei High Powered Committee kaltlangin Laboratory Technician pahnih lak belh an nih tur thu a sawi. 

Lunglei District-a Covid-19 positive mi 45 enkawl mek chungchang pawh sawiin Lunglei DC chuan tuna Covid-19 positive enkawl mekte hi mipui vantlang zinga hmuhchhuah ni lovin, state dang atanga rawn haw, Government Quarantine Facility, Community Quarantine Centre leh Home Quarantine a awm laite niin, Sorkarin COVID-19 positive-te enkawlna tur a buatsaihah dah nghal an ni a. Mipui tan chiaina tur a awm lova, a hmunhmate pawh Disinfection Team-te'n an tihthianghlim nghal vek a ni. Sorkarin inkaihhruaina a siamte zawm a, fimkhur taka kan awm hian tuna Positive Case-te avang hian hlauhthawn tur a awm lo a ni, a ti.

Tun dinhmunah Lunglei District-a Deputy Commissioner-in Containment area-a a puan tawh te chung hengte hi an ni:

1. Government Quarantine Facility - EMRS, Pukpuia Boys' Hostel building atanga metre 20 huam chhung.
2. ETC SIRD luhna chhaka Dedicated Covid Health Centre (DCHC) atana hman mek building atanga metre 20 huamchhung.
3. Lunglei Government College (Covid Care Centre) huam chhung, Main Gate atanga Arts Block inkar leh a thlang lam meter 20 huam chhung.
4. Gov't High School, Lunglei (Government Quarantine Facility) huam chhung.
5.  Community Quarantine Centre, BCM Electric Veng – Hmar lam atangin Pi Zuimawii te in peng (BCM Biak in peng) a ni ang a, chhim lam atangin BCM Biak in leh Pu Zahmingthanga te in inkar.
6. Lunglawn kawng chung peng atanga Pi Lianchami in inkar leh chhuah lamah Pi Lianchami in atanga Thlanmual No.1 inkar.

Heng Containment Area-ah te hian Medical Duty, Security Duty, leh Deputy Commissioner-in phalna a pekte chauh lo chu mi tumah an lutin an chhuak tur a ni lo.