902/2022-2023

Nikir thla ni 14, 2022: Vawiin kha khawvel puma thisen pe ṭhinte chawimawina leh thisen pe tura infuih tharna ni atana hman ṭhin, "World Blood Donor Day" (WBDD) a ni a. Lawngtlaiah chuan Association for Voluntary Blood Donation (AVBD), Lawngtlai leh Blood Bank, District Hospital Lawngtlai te ṭang kawp buatsaihin LADC Conference Hall-ah hman niin, a thlawna thisen pek runpui buatsaih a ni.

Thisen pek ṭan hmaa inkhawm tawi buatsaihah Lai Autonomous District Council (LADC)-a Executive Member i/c PHED, etc. Pu HC Lalthawmliana chu Khuallian a ni a. Thu sawiin, ṭhian chhan thih ngam hnam intite tan chuan thih kher ngai lova ṭhiante leh mi dang chhan theihna thisen pek chu tih âwm leh remchang tak a ni, a ti a. Mihringte'n mi hnena thilpek kan pek theih hlu ber chu thisen pek hi a ni tiin, thisen pek chu a hlauhawm loh va, thisena mihringte tlantu Isua zuitute tan phei chuan mi dang chhan nana thisen pek chu a inhmeh hle a ni, a ti a. AVBD te hnenah hian ₹ 5,000/- a hlan nghal a ni.

He hun hman hi AVBD Lawngtlai Senior Adviser Pu C. Lalhruaitluanga'n a kaihruai a. LIKBK Central Ṭhalai Pawl Secretary Rev. Lalropeka Chinzah chuan hunserh hmangin, Lawngtlai Blood Bank-a Laboratory Technician Pu L. Vannunropuia'n Blood Bank report a pe a. AVBD President Pu Elvis Lalthangzuala pawhin thu sawiin, thisen pek pawimawhna leh mi dangte pek tlak thisen thianghlim nei tura mahni invawn thianghlim leh hriselna ngaih pawimawh a ṭul thu a sawi a. AVBD Secretary Pu VL Hmangaihzuala'n lawmman semna leh lawm thu sawina hun a hmang bawk.

He hunah hian kum tina calendar fel tak siama an hnuaia bial leh unit-te thisen pek hun ruahman ṭhin kohhran ṭhalai pawl pahnih - Lawngtlai Area Ṭhalai Kristian Pawl Coordination Committee leh Lairam Isua Krista Baptist Kohhran Central Ṭhalai Pawl te hnenah chawimawina thuziak hlan a ni a. Nikum June ni 14 leh kumin June ni 14 inkara pawl leh kohhran anga thisen petute - YLA, M. Kawnpui Branch; Salvation Army Youth, CO Bial; KṬP, Lawngtlai Pastor Bial; PYD (Mizoram), Lawngtlai Bial; PYD (UPC NEI), Lawngtlai District; Adventist Youth Federation, Lawngtlai Branch; NSS Unit, Govt Lawngtlai College leh NSS Unit, GRHSS te hnenah chawimawina thuziak hlan a ni bawk.

Kumin World Blood Donor Day thupui atan hian "Donating blood is an act of solidarity. Join the effort and save lives" (Nun chhan tura thisen pek kawngah i ṭang rual ang u) tih hman a ni a. WBDD pual inkhawm tawi hman zawh hnu hian LADC Conference Hall-ah leh ANM School Lawngtlaiah te thisen pek runpui buatsaih zui niin, mi 24-in thisen unit 24 an pe a. Thisen petute hi hmeichhia 11 leh mipa 13 an ni.

Kum 2021-2022 chhung khan Lawngtlai Blood Bank chuan thisen unit 1,103 lain, chu'ng zinga unit 936 (84.8%) chu mimal tih bik awm lova a mamawh apiangin an hman atana pek (voluntary) niin, unit 167 (15.2%) chu mimal tan bika pek (replacement) a ni a. Nikum chhung vek khan Blood Bank aṭang hian thisen hi damlo mamawhte tan District Hospital Lawngtlaiah unit 407 (45.8%), Lairam Christian Medical Centre & Hospital-ah unit 431 (48.7%) leh Christian Hospital Lawngtlaiah unit 49 (5.5%) pek chhuah a ni.

Vawiin World Blood Donor Day puala Aizawla hun buatsaihah AVBD chuan mi dang nun chhan nana vawi 50 thisen pe tling tawhte hnenah chawimawina a hlan a. Lawngtlai District aṭangin mi pathum -
1. HC Vanlalruatpuia, Lawngtlai Bazar
2. Lalramdinsanga, New Vengpui, Lawngtlai
3. R. Lalramfela, Lawngtlai Bazar
te chuan he chawimawina hi an dawng a ni.