903/2022-2023

Dated Serchhip, the 14th June, 2022: Vawiin tlai khan Power Grid Corporation of India Limited Corporate Social Responsibility Fund Rs. 21 Crore sum hmanga sak tur Serchhip District Hospital Building thar sakna hmun tur chungchanga inkawm hona DC Meeting Hall ah Bawrhsap Pi Nazuk Kumar, IAS, hovin Bukpui lama sak duh NGO Co-ordination Committee aiawhte leh a hmun ngaia sak tha zawka ngai Joint Action Committee aiawhten an nei.

He hunah hian Pi Nazuk Kumar chuan, vawiinah hian Hospital building thar sakna hmun tur thlang turin kan thukhawm hran lova, a sakna hmun tura ngaihdan inang lo awm mekah thu inhmu tak leh inhruipawhna boruak tha lo awm lova sawrkarin sak a duhna lam apianga tha taka kan sak theih nana rilru puitling tak kan put theih nan inkawm hona kan buatsaih a ni, a ti. Bawrhsap hian mipuite pawhin inhruipawhna tha lo leh midangte rilru tina thei zawnga tawngkam nei lo turin a ngen bawk.

NGO Coordination Committee hruaitute hian sawrkarin sak a duhna lam apiangah dodal lovin an pawmpui thei tih an tarlang a, Joint Action Committee lam pawh hian sawrkarin district Hospital in a mamawh thil dangte nen, felfai taka a sak theih dawn phawt chuan khawi hmunah pawh sa se sawiselna an nei lo tih an tarlang a ni.

Bawrhsap hi Pu Lalmuansanga Ralte, Addl. DC, Pu Stephen Lalrinawma, SP, Pu K. Saitluanga, DD, I&PR leh Pi F. Lalnisai, SDC ten an tawiawm a ni.