904/2022-2023
Aizawl, 14th June, 2022 : Vawiin khan Co-ordination Committee on Management of Aizawl City (CoMaci) member te chuan Pu R Vanrengpuia Addl.D.C hovin SIPMIU ngenna bawhzuiin Vaivakawn Traffic Point atanga Chanmari West panna kawng, Hunthar lei tlahniam inkara SIPMIU tui pipe phumna chu a hmunah kal chilhin an thlirho va. Hun eng emaw chen tui pipe phum hna chawlhsan lailawk chu, mipui tana harsatna awm theite thlir tel chungin hna chhunzawm leh thuai dan tur sawiho a ni.

Vaivakawn leh Hunthar inkara SIPMIU tui pipe phum hna hi kumin January ni 14, 2022 khan thawh ?an a ni a. Ni 99 chhunga thawh zawh hman tura ruahman a ni a. He tui pipe hi Aizawl khawpui chawmtu Aizawl Greater Water Supply Scheme Phase 1(1988) leh Phase 11(2012) te chhawktu tur leh, kum 2033 a Aizawl khawpui tui mamawh phuhru zo tura ruahman a ni a. SIPMIU Project Director, Er.Lalrothanga, CEO Aizawl Smart City ni bawk chuan project report pe in he project hi nitin tui litre maktaduai 37 pump thei tura ruahman a ni tih a sawi a. Peih fel a nih hun chuan Aizawl GWSS Phase 1 &11 te nena belhkhawmin nitin mi pakhatin tui litre 135 an dawng thei dawn a ti a. Tluang taka hna kalpui a nih laiin India President lo kal laia hna chawlhsan lailawk a nih thu leh chumi hnuah ruahsurin an hnathawh a tih khaihlak tak avangin hun eng emaw chen chawlhsan a ni tih a sawi a. He project hi chhunzawm leh thuai an duh tih sawiin Pu Rothanga chuan hna chhunzawm leh hun turah SIPMIU chuan Coordination Committee on Management of Aizawl City thuchhuak an lo ngaichang dawn tih a sawi.

Mizoram sawrkar hnuaiah Coordinatioon Committee on Management of Aizawl City(CoMaCi) hi kum 2019 khan din a ni a. AMC leh Department pawimawh eng emaw zat te bakah BSNL leh Local Council te an tel a. Aizawl khawpui hmasawnna ruhrel dinna tura department ten project hrang hrang an neih te anmahni remchan dan anga kalpui mai lovin, vantlang tana harsatna awm theite enpui a, hna kalpui dan turah ruahmanna te siampui turin he Committee hi D.C Chairman na hnuaiah din a ni.

Pu R.Vanrengpuia Addl.D.C chuan CoMaCi chu kum 2019 a din tawh ni mah se, hripui vangin a nihna tur ang takin a la thawk lo va. Aizawl khawpui chhunga hmasawnna hnathawh te mipui tana harsatna siam lo thei ang bera kalpui an nih theih nan CoMaCi in khauh zawka thil a kalpui pawh a la ngai zel dawn a ni a ti a. SIPMIU project chhunzawm turin remchan lohna awm anga a lan loh thu sawiin a hun tur erawh chu la tih chian ngai a ni tih a sawi.