Vawiin khan Association for Voluntary Blood Donation (AVBD), Lawngtlai leh Lawngtlai District Hospital Blood Bank tang kawp huaihawtin World Blood Donor Day chu SSA BRC Hall, Lawngtlaiah hman a ni a; thisen pek runpui buatsaih a ni.

Khuallian Central YLA President Pu J.Sangthangpuia chuan Blood Donation Camp buatsaih a ni chu lawmawm a tih thu sawiin, a buaipuitute inpekna leh thahnemngaihna a fak a. Thisen pek chu Kristiante tih atana thil mawi a ni tiin, thisen pe thei reng chunga vawi khat mah la pe lote chu an inngaihtuah chian a tul hle ang, a ti. Pi leh pute hun lai anga mi hrang, sa hrang beih tur a awm tawh loh avangin, tunlai khawvelah chuan mi dangte tana thisen petute hi pasaltha, nopui dawm tur an ni tiin, kal khawmte chu thisen pek ngai pawimawh hram turin a ngen nghal a ni. Khuallian hian AVBD, Lawngtlai hnenah Rs 5000/- a hlan bawk.

Hawnna inkhawm hi AVBD, Lawngtlai President Pu Elvis Lalthangzuala'n kaihruaiin, AVBD hma lak dan a sawi a. Lawngtlai District Hospital Medical Superintendent Dr Lalchhuankimi paw'n District Hospital Blood Bank report pein, thisen pek pawimawhna a sawi a. Thisen sawngbawlna senso (Blood Processing fee) atana Rs 550/- an lak thin chu thisen man a ni lo va, senso hautak lutuk tur phuhruk nan a ngai zat atanga 16% chauh lak a ni tiin, tu ma'n thisen pek tim phah lo turin kal khawmte a ngen.

He hunah hian nikum (2015-16) chhunga thisen pe tha mi pahnih - Jacob Vanlalchaka, AOC Veng leh Laltlanchhuaha Fanai, Lawngtlai-III te hnenah lawm thu sawina thilpek hlan a ni a. Anni hian nikum khan vawi thum ve ve thisen an pe a ni.

Vawiina thisen pek runpuiah hian Govt Region Higher Secondary School leh South Heath Academy sikul naupangte leh zirtirtute bakah, AVBD member leh mi mal tlawmngaite'n thisen an pe a. Mipa 23 leh Hmeichhia 1-in thisen unit 24 an pe a ni.

Lawngtlai District Hospital Blood Bank hi kum 2008 atang khan hman tan niin, tunah hian thawktu - Blood Bank Officer 1, Laboratory Technician 2 leh IV Grade 1 an awm mek a. Nikum (2015-2016) chhung khan thisen unit 471 dawngin, he'ng zinga 74.5% chu tih bik awm lova pek (voluntary donation) niin, 25.5% chu damlo tih bik tana pek (replacement) a ni. Blood Bank-a thisen dah khawl atang hian unit 401 chu damdawi in dangah pek chhuah a ni bawk.