Association for Voluntary Blood Donation (AVBD) Lawngtlai District huaihawtin vawiin khan Lawngtlai Bazar Venga JH Lorrain Hall-ah thisen pe thinte chawimawina ni “World Blood Donor Day” (WBDD) hman a ni. 

He huna Khuallian Lawngtlai DIPRO Pu C. Lalhruaitluanga chuan thisen pek chu mi dangte tan malsawmna nih theihna sang ber a nih thu sawiin, thisen pek chu Krista anna a ni, a ti a. Thisen petute chuan mi nun mai chhanhim lovin, an thlarau pawh an chhanhim tel a, thlarau bo man theihna kawng pawimawh tak a nih avangin ringtute tan phei chuan thisen pek chu uar deuh deuh chi a ni, a ti. 

He hun hi AVBD Lawngtlai District President Pu Elvis Lalthangzuala chuan a kaihruai a. WBDD chu June ni 14-a hman thin ni mah se, a ni-ah tak an hman theih loh avanga vawiina an buatsaih tak mai thu sawiin, kal khawmte chu thisen pek uar deuh deuh turin a sawm nghal a. Presbyterian pastor Rev. Lalfakawma chuan hunserh hmangin, District Hospital Lawngtlaia Medical Officer Dr Zothanpari Chhakchhuak hnen atangin Blood Bank report leh thisen pek chungchang ngaihthlak a ni a. AVBD Secretary Pu H. Lalrinngheta chuan kum kal ta chhunga AVBD hma lakna report a pe a. A thlawna thisen pe hnem zual pawl hnenah lawm thu sawina thilpek hlan a ni bawk. 

AVBD Lawngtlai District hma lakna kal tlang hian kum kal ta WBDD leh kumin WBDD inkar (June 14, 2017 - June 14, 2018) chhungin pawl 21-in a thlawna thisen pek runpui huaihawtin, hemi atang hian thisen unit 605 hmuh a ni a. Nikum chhunga thisen pe tam ber Govt Region Higher Secondary School NSS te chuan voluntary blood donation camp tum 2 huaihawtin, a zavaiin thisen unit 78 an pe a; pahnihna TKP Lawngtlai South Pastor Bialin unit 71 pein, pathumna LIKBKTP Paithar Pastor Bial chuan unit 59 an pe bawk. 

District Hospital Lawngtlai Blodd Bank-ah kum 2017 chhung khan thisen unit 1064 lutin, chu’ng zinga unit 745 (70%) chu tih bik awm lova pek (voluntary donation) a ni a, unit 319 (30%) chu damlo tih bik tana pek (replacement) a ni. Kumin 2018 May thla thleng khan thisen unit 494 lut tawhin, voluntary unit 361 (73%) leh replacement unit 133 (27%) a ni thung. Blood Bank-a thisen dah khawlte hi Lawngtlaia damdawi in pathum – District Hospital, Christian Hospital leh Lairam Christian Medical Centre-ah te an mamawh dan azir zela pek chhuah thin a ni.