Vawiin hi vaihlo leh a kaihhnawih laka inthiar fihlim ni (World No Tobacco Day) a ni a. Lawngtlaiah chuan National Tobacco Control Programme, Lawngtlai District huaihawtin DC Conference Hall-ah Bawrhsap Dr A. Muthamma IAS hovin hman a ni.
Lawngtlai District Anti-Tobacco Squad Chairman Dr A. Muthamma chuan World No Tobacco Day chu kum 1987 atanga hman tan niin, vaihlo leh a kaihhnawih tih miah loh ni atan hman thin a ni a; Lawngtlai District-ah pawh chuti ang taka inserh thianghlimna ni atan chuan hman ve thin ni se, a duh thu a sawi a. Mizote chu faina, tlawmngaihna, infiamna leh ziak leh chhiar kawngah te kan chhuanawm viau laiin, zuk leh hmuam ti kan tam lutuk chu hmasawnna kawnga kan than tithutu leh min daltu lian tak a ni, a ti a. Pi leh pute chuan an hriat loh vang te, changkanna chi khat leh incheina anga an ngaih vang te'n zuk leh hmuam an ti thin a, thangtharte chuan a that lohzia kan hriat tawh avangin kan bansan a hun tawh a ni, a ti.
He hun hi Sr Medical Officer, NTCP-a District Nodal Officer Dr S. Thaizi chuan kaihruaiin, kal khawmte lawmna thu a sawi a. ATS member, LADC-a Art & Culture Officer Pu T.Chalnghingluaia chuan kum 1990 atanga kum 2001 thleng mei a zuk hnua September 2001-a a bansan tak dan leh mei a zuk lohna hnua hmasawnna leh malsawmna hrang hrang a dawn te a sawi a. ATS member, Govt Lawngtlai College-a Associate Professor Pu LH Mawia Hnyaloom chuan lawm thu a sawi hnuah, dan phal lohva zawrh meizial man khawm sa eng emaw zat tihchhiat nghal a ni.
Kumin World No Tobacco Day hian thupuiah "Tobacco - a threat to development" (vaihlo - hmasawnna daltu) tih hman a ni a. Lawngtlaia hun hmanah hian ATS member te bakah, vaihlo leh a kaihhnawih laka fihlim khua (tobacco free village) ni tura hma la mek Chawnhu khawtlang hruaitu leh pawl hrang hrang ai awh te an tel a. Meizial man sa tihral tak hi a zavaiin - Hummer packet 430, Farstar packet 257 leh Valiant​ packet 494 a ni a; Rs 31,950/- man hu a ni.
