Vawiin chawhnu dar 1 khan National Tobacco Control Programme (NTCP) bul tumin Lawngtlai DC Conference Hall-ah World No Tobacco Day hman a ni a. Additional DC Pu R.Lalsangluaia chu Khuallian a ni.

Pu R.Lalsangluaia chuan vaihlovin hriselna a khawih pawi nasatzia sawiin, a venna kawngah chak zawka hma lak a pawimawh thu a sawi a. Pi leh pute’n thosi hlauh atan tih chhuanlama mei an zuk thin chu tunah chuan chhuanlam tling a ni tawh lo tiin, zuk leh hmuam chu tul lova buaina leh sum senna mai a ni a, hnam mawl zia kalsana hnam fing ni turin vaihlo tih hi kan bansan a tul a ni, a ti. Vaihlo do lama hma latute chu tha thlah hauh lova tan la tura chahin, sawrkar department hrang hrang hotute pawh mahni department theuhvah theihtawpa hma la turin a chah bawk.

Vawiin hun hi DPPM Coordinator Pu K.Lalnunsanga’n a kaihruai a. NTCP Social Worker Pi Lalnunthari’n kumin WNTD thupui “Get Ready for Plain Packaging” (vaihlo tuam dan pawimawhna leh nghawng a neihte) tih sawiin, District Consultant Pi K.Hmingthansangi’n vaihlo that lohzia leh khapna dan hman mek (COTPA) chungchang a lem nen entirin, a sawi fiah a. MJA member Pu Elvis Lalthangzuala’n lawm thu sawiin he hun hi a khar a ni.

Khawvel pumah mei zuk avangin mi nuai 60 vel kum tin an thi a; chu’ng zinga nuai 6 te chu mi dang zuk khu an hip avanga thi an ni. Vaihlo that lohzia inzirtir nan World No Tobacco Day hi World Health Organisation (WHO) bul tumin kum 1987 atang khan hman tan a ni a, kum tin thupui thlan bik neiin May ni 31-ah hman thin a ni. Kumin hian vaihlo tuamna kawr inang tlang hmang tura hma lak mek chungchang inzirtirna atan he hun hi hman a ni a. Mite’n zuk leh hmuam an tih hrehna turin vaihlo tuamna kawrah a that lohzia lantirna milem leh thuziak chiang tak tar vek tura hma lak mek a ni.