Vawiin chawhnu darkhat khan Govt. Champhai College Seminar Hall-ah World No Tobacco Day 2016 hman a ni a, Champhai District Bawrhsap Pu Vanlalngaihsaka, IAS chu khualian niin Champhai District Anti-Tobacco Squad (ATS) member-te leh tlawmngaipawl aiawhte bakah Champhai HSS leh Easter Flower Academy zirlaite an tel a. School coumpound vaihlo laka vawng fihlim chawimawina citation chu Easter Flower Academy hnenah hlan a ni bawk. Inkhawm tawi neih a nih hnuah ATS-ten vaihlo leh a kaihhnawih thil an man khawmte tih ral a nih bakah Champhai khawpui chhunga dan phalloha cigarette zuarte dapchhuah beihpui thlak nghal a ni bawk.

Champhai District Bawrhsap, ATS Chairman ni bawk Pu Vanlalngaihsaka IAS chuan World No Tobacco Day chu vaihlo leh a kaihhnawih ti thin ten an sim theih nan leh a sim theilote pawhin sim tura hma an sawn theih nan World Health Organization-in kum 1987 atangin a hmang tan tih a sawi a. Vaihlo hi a ngai laklawhte chuan a thalo tih hre reng chungin an tilui zel thin tih sawiin, zirlai kalkhawmte chu tichhinlo turin DC chuan a fuih a. Dan fel tak awm mahse puipun ni khuaa midang ngaipawimawh lova vaihlo zu khu luih luih mai kan la awm hi a pawi a, kohhran leh tlawmngaipawlten inzirtir uar a tul hle a ni a ti bawk. Khuallian chuan Office-a polite taka meizial zuk in dil chin hi a changkang lova, midangte tan harsatna leh awm tinuamlotu a nih thu a sawi bawk.

World No Tobacco Day 2016 pual inkhawm hi Govt. Champhai College Principal, Pu Lalnunmawia’n a kaihruai a. Pi Lalthantluangi’n State Nodal Officer thuchah a chhiarchhuah bakah DTCC District Consultant Pu Zosangzela’n DTCC hnathawh dan leh hmachhawp a tarlang a. DTCC-a Psychologist Pi Lalruatdiki Hnamte chuan vaihlo leh a kaihhnawiin mihring a tih chhiat theihdan kimchang takin zirtirna a pe bawk.

Champhai District Tobacco Control Cell (DTCC) hmalaknain kum August 2015 leh April 2016 inkar khan School hrang hrangah awareness campaign vawi 72 neih a ni a. Hemi hun chhung vek hian ATS chuan Drives vawi 46 neiin an thil man atanga pawisa chawi tlingkhawm chu Rs. 7,150/- lai niin Court ngaihtuah tura thubuai siamsak 9 an awm tawh bawk. Champhai District Hospital-ah Tobacco Cessation Clinic (TCC) hawn niin vaihlo bansan duhte tan pan theih reng a ni a, an mamawh ang zelin damdawi leh counseling pek thin a ni a, nikum chhung khan mi 250 an enkawl a, za zela 26% ah hlawhtlinna an hmu a ni. Mizoram mipui 67% chu vaihloah inhnamhnawihin 96% lai chu an bula mite vaihlo zuk tuartu ni a chhut a ni bawk.

Attachment

  • Loading attachment...