Vawiin chawhma dar 10:30 khan Lai Students Association (LSA) General Headquarters, Lawngtlai chuan Central YLA Hall, Lawngtlai-III-ah kum 2016 HSLC leh HSSLC exam-a ti thate chawimawina hun an hmang a. AH&Vety Minister Pu C.Ngunlianchunga'n a hmanpui.

Pu C.Ngunlianchunga chuan zirlai ti tha, chawimawi tlak ni turin zirna ngawr ngawr bakah hriselna, chakna leh damna a pawimawh a, chumi nei tur chuan zirlaite'n insum theihna an neih a pawimawh hle a ni, a ti a. Hlawhtling tur chuan mahni inrintawkna nen tum fel tak nei chunga lehkha zir a ngai tiin, mi dang nuna buai ve lo zirlaite chuan hlawhtlinna an hmu thin, a ti bawk. Pu C.Ngunlianchunga chuan Lawngtlai District atanga kumin 2016-a HSLC leh HSSLC pass tha Top Ten chinte chu Laptop pek an nih vek tur thu a sawi a ni.

Khual zahawm LADC-a Executive Member Pu Laltlawmlova Chinzah, Middle School changtu pawhin thu sawiin, Lawngtlai District-in zirna lamah hma a sawn zel theih nan theihtawp an chhuah tur thu sawiin, zirlai ti thate tan District Council chu a inhawng hle dawn a ni, a ti.

Vawiin hun hi LSA Vice President Pu MC Lalhuappuia'n a kaihruai a. Lai Students Association-in zirlai ti tha an chawimawite hi HSLC Distinction-a pass mi 24 leh HSSLC Distinction-a pass mi 4 bakah, Lawngtlai District chhunga naupang pass kim vekna school 4 - Ngurnunsangi English School, Lawngtlai; Jehova Jireh Higher Secondary School, Lawngtlai; Nazareth Comprehensive High School, Vathuampui leh Mampui High School te an ni a. He'ng zirlai leh school ti thate hi Khuallianin lawmpuina hlanin, LSA-in thuziak an buatsaih bakah Minister hian Lai Tawnga siam Holy Bible a pe vek bawk a ni.