Vawiin khan PWNM, UNAIDS, World Vision leh Agapia Sical Centre tangkawpin HIV/Aids vanga nunna chan tate hriatrengna hun ‘International AIDS Candlelight Mermorial Service’ chu I&PR Auditorium-ah hman a ni a. He hunah hian Health & Family Welfare Minister Pu Lal Thanzara chu Khuallian niin Care-World Vision India Programme Manager Pu Chandra Kanto Molsom chu Khual zahawm a ni bawk.
AIDS Candlelight Memorial Service Pu Robert Lalrempuia Khiangte, Coordinator kaihhruaiah Khuallian Pu Lal Thanzara chuan HIV/AIDS-in rampum a run mek zelah Mizoram chu HIV/AIDS tamna ber dawttu state a nih hi a lungngaihthlak hle a, HIV/AIDS dona kawngah sorkar leh hemi lama inhmang NGO-te bakah kohhran leh mitinten beihpui kan thlak a hun takzet a ni, a ti a. HIV/AIDS dona kawngah mimal thahnemngaihnain Mizorama MLA 40 te chuan ‘Mizoram Legislaive Forum for AIDS’ dinin MLA fund atangin cheng nuai 1 theuh an thawhkhawm sum hmangin thisen test-na khawl ‘CD4 Count Machine’ lei a ni tawh a, he khawl hi a mamawhten an hman nghal theih nan Aizawl Civil Hospital-ah 6 June 2016 (Thawhtanni) atangin bunfel a nih tur thu a sawi a. Aizawl Civil Hospital ART Centre-a HIV/AIDS investigation ti turte tan a thlawna inentir phalsak an nih thu a puang bawk. HIV/AIDS dona kawngah MSACS ten theihtawp an chhuah zel a, kohhrante nen thawhhonate siamin mipuite a zau theih ang berin HIV/AIDS laka inven dan leh inenkawldan chungchangte hrilhhriat an ni zel chu lawmawm a tih thu a sawi a; HIV/AIDS veite enkawl leh he natna dona kawnga hmalatu pawl Positive Women Network of Mizoram (PWNM) hnenah tanpuina sum engmawzat Pu Lal Thanzara hian a hlan bawk.
Khual zahawm Pu Chandra Kanto Molsom pawhin thusawiin Mizoram khaw 80 chuang a tlawh tawhnaah HIV/AIDS chungchang hre lo tam tak an la awm thu leh kawlphetha pawh la awm lohna khuaah HIV/AIDS natna vei hmuhchhuah an ni, a ti. HIV/AIDS tihremna kawnga sorkar emaw pawl pakhat emaw chauha innghah a hun tawh lova, kohhran leh mipui zawng zawngte tanrual a hun tawh takzet a ni, a ti bawk. HIV/AIDS hi hmuhchhuah hma a nih chuan a veitute enkawl theih an ni a, damdawi ART a hun taka pek an nih zel chuan midangte ang bawkin an nun an hmang chho thei a ni tiin Pu Chandra Molsom chuan he natna rapthlak tak hi sipaiten indonaa an theihtawp an chhuah thin angin mitinten mawhphurhnaah ngeiin beilet a ngai a ni, a ti.
PWNM President Pi Vanlalruati chuan khawvel pumah May thlaa Pathianni tawp ber hi ‘International AIDS Candlelight Mermorial Service’ atana hman thin a nih thu a sawi a. He Service lo pianchhuah dan sawifiahin kum 1983 khan USA-ah HIV/AIDS vei mi 2 ten sorkar leh khawtlangin he natna veite ngaihsak leh chhawmdawlna lamah tanla tura phutin kawngzawh an huaihawt a, hei hi ramdanga HIV/AIDS natna veiten an rawn thlawp zel avangin he natna chungchangah mipuite an harhchhuah phah ta a; chuta tang chuan vawiin thleng hian HIV/AIDS avanga nunna chante hriatrengna he Ni hi hman chho a ni ta a ni.
Vawiina Candlelight Service hmannaah hian MSACS Director Dr.Lalmalsawmi Sailo leh Medical Superintendent, Aizawl Civil Hospital Dr. K.L.Remsanga te pawh an tel a. HIV/AIDS enkawl laite tan inenkawl dan chungchangah inzirtirna leh sawihona hun hman a ni bawk.
