Vawiin hian Lawngtlai DC Conference Hall ah World Population Day 2015 chu hman a ni a, Lawngtlai Bawrhsap Pu J. Hmingthanmawia chu khuallian a ni.

Pu J. Hmingthanmawia chuan World Population Day in a tum pawimawh ber pakhat chu ruahmanna fel tak neia chhungkaw din leh enkawl a nih thu sawiin, ruahmanna hnuaia chungkaw enkawl (Family Pallning) tih mi thenkhat ten Birth Control tihna emaw an ti nia a hriat thu sawiin, Birth Control chu Family Planning hmanraw chikhat ve mai a nih zawk thu a tarlang a. Family Planning chuan chhungkaw dinhmun, ram dinhmun leh hriselna leh damreina turte chena thlir chungin chhungkaw din dan tur a ruahman a ni a ti a, chutiang atana thil pawimawh tak pakhat chu World Population Day thupui; Chhungkaw Hlimna Thuruk – Kum Thum Dana Fa Neih hi ani a ti bawk. Nu hriselna te, fa hriselna te, nu leh fa damreina turte, chhungkaw sum leh pai ruahmanna fel zawk nei turte, fanau fing leh thiam neih theih nan te leh ram hmasawn nan ruahmanna hnuaia chhungkaw din a pawimawh em em a ni tiin kalkhawmte chu a hrilh a ni.

World Population Day hmanna inkhawm hi Dr. HC Thangkima, Chief Medical Officer, Lawngtlai chuan a kaihruai a, a ni pawhin World Population Day thil tum hrang hrangte a tarlang a, kum thum dana fa neih sawrkar-in a sawi chhan hi fa neih tlem tum vang ngawr ngawr nilovin, chhungkaw hrisel, dam rei zawk, finna leh thiamna lama sang zawk, ei lah bar zawn kawnga dinhmun tha zawk te ngaihtuahna avang a nih hlawm thu a sawi a, chhangkhatna hmanraw chi hrang hrang leh a hman dan te, a hman hun te a sawifiah bawk a ni.

Hemi hnu hian kalkhawmte chuan zawhna an neih leh sawi duh an neih apiangte an zawtin an sawiho zui nghal a ni.

World Population Day hi kum 1987 July ni 11 atang khan khawvelah hman tan a ni a, a hman tanna ni hi khawvel mihringten tluklehdingawn 5 kan tlinna ni tak a ni nghe nghe a. World Population Day  hi khawvel ram 200 chuangah hman chhunzawm zel a ni bawk. Khawvel mihringte hian pun lamkanpan zelin, kumin March thla khan Tluklehdingawn 7.2 kan tling chho tawh nghe nghe a ni.