Mizo thalai ten eizawnna tlak thiamna an zirchhuahna tura Mizoram Youth Commission-in Mizoram pawn lama mithiam te nen tangkawpa training a buatsaih thin chhunzawmin Emporium Training & Consultancy Pvt. Ltd. Kolkata-a thla ruk chhung training nei turin vawiin khan Mizo nula 38 te chu NLUP Implementing Board Chairman Pu J.H.Rothuama’n fuihna thu sawiin a thlah liam.
ATI Conference Hall-a thlahna hun hmanna ah Pu J.H.Rothuama chuan MYC-in rintlaka a ngaih leh Mizo thalai tam tak lo zirchhuah tawhna ah Sawrkar sum sengin training an nei thei tur chu an vanneih zia hre renga taima tak leh thahnemngai taka zir turin a chah a, hlawhtlinpui ngei tura tumruhna nen bei theuh turin a fuih bawk. Ram tana mi tangkai ni turin leh, an nu leh pa te chhawk zangkhaia chawmtu ni tura training tha taka zirchhuak theuh turin a ngen bawk a ni.
MYC Chairman Pu T.Sangkunga pawhin thu sawiin Mizoram Sawrkarin thalaite hmakhua ngaihtuahin MYC kaltlangin thalai tam tak phaiah training a buatsaih sak thin a, chung atang chuan India ram hmun hrang hrang leh ram pawn thlenga mi engemaw zatin hna tha tak tak an thawh mek thu a tarlang a. Hindi leh sap tawng thiam tum theuh tura fuihin, chhel taka awma, an thil zir ah te hlawhtlinpui ngei turin theihtawp chhuaha tan la theuh turin a chah bawk.
Vawiina training kal tur te hi mi 38 an ni a, Mizoram hmun hrang hrang atanga thlanchhuah te an ni. Mizoram Youth Commission hian vawiin thlenga training nei tura a tirhchhuah tawh zawng zawng chu 1,299 an ni a, heng zinga 631 te hian training zovin hmun hrang hrangah hna an thawk mek a, tunah hian 668 ten training an bei mek bawk a ni.
Vawiina training tur thlahna inkhawm hi Pu Lalrengmaia, MYC Member-in a kaihruai a, Emporium Training & Consultancy Pvt. Ltd. hotu Pu Anirban Mukherjee pawhin thu sawiin sawrkar laipui hmalakna Skill Development Initiative Scheme hnuaia thalai te eizawnna tlak thiamna pe tura training an buatsaih thin dan te a sawifiah a, Mizo thalai tam tak an hnuaia training chhuak te chu an hnathawhna hrang hrangah an thawh that thu te sawiin Mizoram Sawrkar nena an thawhhona leh tawiawmna zawng zawngah lawmthu a sawi bawk. Vawiina training tur thlahna ah hian training zo hlim Nl Lalhmachhuani, d/o Ramfangzauva, Republic Veng, Aizawl, tuna Jet Airways-in Air Hostess atana an lak thar chuan fuihna thu tawi a sawi bawk a ni.
