No.4356/2021-2022

Vau thla ni 22, 2022: Vawiin kha khawvêl pum huapa tui ngaihhlut inzirtîr ni, "World Water Day 2022" a ni a. Lawngtlaiah chuan Public Health Engineering Department (PHED), Lawngtlai Division buatsaihin DC Conference Hall-ah hman a ni a, Lai Autonomous District Council (LADC)-a Chief Executive Member (CEM) Pu V. Zirsanga chu Khuallian a ni.

Pu V. Zirsanga chuan tui chu nunna pakhat a nih thu leh a tel lova mihring nun a famkim loh thu sawiin, tui mamawhtu mihring kan pun zêl laiin, tui erawh a tlêm tulh tulh thung a, ṭûl lovah tui kan la tiriral nasa êm êm bawk a, tui renchem nachâng kan hriat a ṭûl tawh tak zet a ni, a ti a. Ei leh in atân mai ni lovin, thlai leh chaw thar chhuak tûrin tui kan mamawh a, rilru fîm tak pu-a tui hman dân leh khawsak dân kan thiam loh chuan kan khawsak a harsa zêl dâwn a ni tiin, sawrkar, department leh tlâwmngai pâwlte hma lâkna râl thlîr mai lo va, tui renchem kawngah te, tui awm sa leh tuihna humhalh leh tipung tûra hma lâkna kawngah te mahni zâwna theih tâwp chhuah ṭheuh tûrin kal khâwmte chu a sâwm a ni.

Lawngtlaia World Water Day puala hun hman hi Lawngtlai Bawrhsap charge la mêktu Pi Marilyn Rualzakhumthangi chuan a kaihruai a. PHED Lawngtlai Division-a Sr Executive Engineer Er Netralal Jaisi chuan kumin World Water Day thupui, "Groundwater : Making the Invisible Visible (Lei hnuai tui : Hmuh theih loh kha hmuh theihah)" tih hmangin thu a sawi a. Sub-Divisional Officer Er L. Sangromuana'n tui pawimawhna, humhalh a ṭûlzia leh tui chungchânga Lawngtlai District dinhmun leh hmabâk te powerpoint presentation hmanga a lem nên entîrin, a sawifiah a. Pi Pc. Lalramnghahmawii, Swachh Bharat Mission (Grameen) kaihhruaiin kal khâwmte'n tui humhalh leh renchem tûra intiamna (water pledge) an sawi rual a. World Water Day 2022 puala lem inchansiak (drama competition) leh auhla inphuahsiak (slogan competition) lâwmman te sem niin, Young Lai Association, Diltlang 'S' Branch te'n lemchan an entîr a. Hemi hnu hian Khuallianin World Water Day puala bike rally kalpui tûr Lawngtlai Bullet Club te chu Bawrhsap pisa tual aṭangin a vai liam nghâl a ni.

Vawiin hun hmanah hian sawrkar official-te, tlâwmngai pâwl hrang hrang hruaitute leh lâwmman dawngtute an tel a ni.

World Water Day 2022 puala LADC huam chhûnga Branch YLA te tâna drama competition buatsaihah Diltlang 'S' Branch YLA chu pakhatna an ni a, Lawngtlai-III Branch chu pahnihna niin, Lawngtlai Bazar Branch chu pathumna an ni a. Best Director-ah HC Lalthanliana, Diltlang 'S'; Best Actor-ah H. Lalpekliana, Lawngtlai Council Veng; Best Actress-ah Lalmuanzuali, Lawngtlai Chandmary leh Best Scriptwriter-ah Dr Krista Roluahpuia, Mualbu 'L' te thlan an ni. Drama competition hi CADC huam chhûngah pawh CYCA te nên ṭang kawpin a hrana buatsaih a ni bawk.

Slogan competition-ah Cindy Lalbiakchhûngi, Lawngtlai Vengpui chu pakhatna niin, pahnihna LH Hauheng, Chawnhu leh pathumna Zohlimpuii Chhakchhuak, Lawngtlai Chandmary te an ni a. Swachh Bharat Mission hla phuahtu Thawnglianthanga, Hmawngbu chu special prize hlan a ni bawk.

World Water Day hi United Nations (UN) bul tumin kum 1993 aṭang khân khawvêl pumah kum tin March ni 22-ah hman ṭhin a ni a. Tui pawimawhna leh hlutna te, humhalh leh renchem a ṭûlzia te au chhuahpuina leh inzirtîrna ni atân hman ṭhin a ni a. Kum tin thupui thlan bîk awmin, kumin 2022 hian thupui atân, "Groundwater : Making the Invisible Visible (Lei hnuai tui : Hmuh theih loh kha hmuh theihah)" tih hman a ni.