No.4354/2021-2022

Aizawl 22nd March, 2022 : Vawiin khan Er. H. Lalzirliana, Bialtu MLA/Vice Chairman, Road & Infrastructure Development Board chuan Siamliana Hall, Mamit-ah Mizoram Handloom & Handicraft Development Corporation Ltd. (ZOHANDCO) -in an buatsaih State Handloom Expo, 2022 chu khuallian niin a hawng.

Khuallian chuan Mizo thil chi hrang hrang puan leh thildangte phochhuah leh a mamawhtute tana lei theihna hun State Handloom Expo, 2022 hawn theiha a awm chu lawmawm a tih thu sawiin mizo kutchhuak hmuh theiha a awm chu mimal tak pawha hmuhnawm a tih thu a sawi a. Pathianin tihsual nei miahlo-in mizo atan min siam a, hnamdang changkang zawkte ngaisang a, an tihdan zir (copy) hi a zahthlakin thalaite zingah Korean ngaihsanna leh an tihdan entawn tum chu thil zahthlak tak a ni a, mizo taka changkan hi kan tum tur a ni a ti. Mizo thuam leh dehchhuahte hi hnamdangin min chawisanpui dawn lova, kan hnam kan zahpui chinah chuan hnam bo kan nih dawn avangin kan dehchhuahte ngaisanga ngaihlu turin kalkhawmte a sawm a ni.

Bialtu MLA chuan Mamit District-in hmasawnna hmel a hmu chho mek chu lawmawm a tih thu sawiin Handloom Expo buatsaih a nih leh hun chuan Mamit khawpui atanga Stall pathum (3) tal hawng ve ngei tura rilru kan put a tulin chona-ah ngaih a tul thu a sawi bawk.

Khuallian hian stall hrang hrang 25 te hi a tlawh nghal a ni.

Pu Lalnunhlua, District Bawrhsap pawhin thu sawiin Mizo thuam chi hrang hrang quality tha tak tak a awm tawh rualin tun aia tha siamchhuak tura ngaihtuahna hmang leh a, mipuite duhthusam ngei siamchhuak zel turin Stall hawngtute a chah bawk.

Pu C. Lalrammawia, Chairman, Zohandco pawhin thu sawiin Zohandco chu thi mai tur a nih laiin kan CM zahawm takin mizo thilsiam chhuah ve tihtawp mai chu tha a tih loh avanga din thar leh a nih thu a sawi a, Zohandco chu sumdawng ni lovin kuthnathawktute'n hlawk zawka an thilsiam chhuahte an zawrhchhuah theih nana lo buaipui a nih thu a sawi. Kum 1988-ah din a ni a, Manipur atanga puan lei thin khan tunah chuan kan thawn let ta zawk a, Tripura, Myanmar leh India rampawnah te pawh thawnchhuah mek a nih thu a sawi. Kan thil siamchhuahte chu mittlung, lei chakawm leh tha a ni tur a ni a, a zuartu(nghaktu) zeina a pawimawh tel a ni a ti bawk.

He hun hi Pu Benjamin Lalzama, MCS, Managing Director, Zohandco chuan kaihruaiin Pu C. Lalrinmawia, Manager, Zohandco-in lawmthu sawina a nei bawk.

State Handloom Expo, 2022-ah hian Mizoram hmun hrang hrang atangin Mizo puantah leh dehchhuah thil chi hrang hrang zawrhchhuah niin stall 25 hawn a ni a. Ni 31.3.2022 (Inrinni) zing thleng a duh apiang tan man man zawka dawr theih an ni ang.