No.4353/2021-2022

Aizawl 22nd March, 2022 : Vawiin khan PHE Complex Mamit Field vengah World Water Day- 2022 hman a ni a. Pu Lalnunhlua Mamit District Bawrhsap/ Chairman, District Water & Sanitation Committee, Mamit District chuan khuallian niin he hun hi a hmanpui.

Khuallian chuan thu sawiin tui thianghlim hnianghnar kan neih reng theih nan leihnuai tui awmte humhalh chu thil pawimawh leh tul tak a nih thu sawiin chumi humhalhna tura kan tih theih bawlhlawh sawngbawl dan tur dik taka sawngbawl leh thingphun uar deuh deuh chu hmalakna tura tihmakmawh a nih thu a sawi a, kan tu leh fate dem kan hlawh loh nan tun atanga hma kan lak a tul a, kan nunna leh dam khawchhuah nana tuihna leh lei chhunga tuihna awmte humhalh tura ngaihtuahna senga penchhuak turin kalkhawmte a sawm a ni.

District Bawrhsap chuan mahni theuh inenfiah chunga Sorkar inkaihhruainate zawm turin District mipuite sawmin hmasawnnain a ken tel ramngaw chereu mekte thuamthar leh a, mahni remhriatna hmanga fur tui khawl kawngah tan la thar leh turin kalkhawmte a sawm bawk.

Pu H. Darhmingliana, Vice President, Sub- Hqrs. YMA Mamit pawhin PHE Department te nen tangruala tuihna humhalhna kawnga hma an lakna chuan rah tha a chhuah ngei a beisei thu sawiin an thawhhona chhunzawm zel tur leh District chhunga YMA Branch hrang hrangte thawhpuina-ah lawmthu a sawi bawk.

World Water Day, 2022 puala buatsaih Inter Branch YMA Drama Competition lawmman semna khuallian hian nei nghalin lawmman pakhatna hi N. Chaltui Branch an ni a, Pahnihna Chaltui Branch niin pathumna hi Phulbial Branch an ni. Consolation Prize hi Remrema leh a thiante, Mamit Chhimveng Branch leh Marpara Branch te'n an dawng bawk.

Kumin World Water Day thupui atan hian "Ground Water - Making the Invisible Visible" tih hman niin khuallian hian hemi puala Rally buatsaih chu a vailiam nghal bawk.

He hun hi Er. Lalzawmliana Sr. Executive Engineer, PHED Mamit WATSAN Division chuan kaihruaiin Er. V. Laldanmawia, SDO PHED, Mamit chuan lawmthu sawina a nei a ni.