Vawiin khan Govt Lawngtlai College Hall-ah Lawngtlai District chhunga zirtirtute tan sawrkar laipuiin zirlaite scholarship dil dan thar a duan chungchang zir hona hun buatsaih a ni.

He hun hi Govt Lawngtlai College Principal Pu T. Thangthuama chuan a kaihruai a. Mizoram Scholarship Board (MSB) Secretary Pu JH Zoremthanga chuan kal khawmte chu hriat tur pawimawh zirtirin, Tribal Scholarship dil hun chhung hi kumin October ni 20 thleng hawn a nih tur thu a sawi a. State chhung leh pawna zirlaite chuan State Portal thar hmangin a hun taka an dil vek theih nana hma la turin zirtirtu kal khawmte chu a chah bawk.

Sawrkar laipuiin Kum 2015-a Digital India a puan atangin scholarship dilna pawh online-in National Scholarship Portal atanga dil a ni a. Sawrkar laipui Tribal Ministry-in state tin hnenah Tribal Scholarship dilna tur hian kumin atang chuan state portal hran hlak siam tura hriattirna a chhuah angin, Mizoram Scholarship Board chuan Portal thar a siam ve ta a. He Portal thar 'Scholarship.mizoram.gov.in'-ah hian Pre-Matric leh Post-Matric Tribal Scholarship chu kumin 2017 atang hian dil tawh tur a ni ang.

Vawiina Tribal Scholarship dil dan thar inzirtirna hunah hian Lawngtlai District chhunga Primary School atanga College thlenga zirtirtu thahnem tak an kal khawm a ni.