Vawiin khan Science Teachers’ Association Mizoram (STAM) leh Lawngtlai District RMSA tang kawp huaihawtin Lawngtlaia Don Bosco School Hall-ah District Level Children Science Congress 2017 buatsaih a ni.

He hunah hian Lawngtlai District RMSA Deputy DPC Pu H. Laltanpuia chuan kal khawmte lawmna leh hawnna thu a sawi a. Hemi hnu hian zirlaite’n ‘Science & Technology’ thupui hmanga an thil zir leh hmuh chhuah te an entir a. Endiktute lam atanga thu sawi ngaihthlak a nih hnuin, result puan zui a ni a. Don Bosco School Vice Principal Fr Joachin-a’n lawmman semin, DCSCC Member Secretary Pu K. Ngunhluna’n lawm thu sawiin, hun khar a ni.

He Science Congress hi zirlaite’n science subject bika rilru leh ngaihtuahna an sen tam a, an ni tin nuna science thil tih theihnain awmzia a neih theih nana buatsaih a ni a. Lawngtlai khawpui chhunga High School panga atangin zirlai 30 telin, heta ti thate hi state level-a an inel hnuah an la tlang zel chuan national level inelnaah an la tel chho leh dawn a ni.

Vawiin inelnaah hian Ngurnunsangi English School chu pakhatna niin, pahnihna Jehova Jireh English School leh pathumna ML Junior English School te an ni.