Vawiin khan MZP Sub-Headquarters, Bilkhawthlir buatsaihin Bilkhawthlir khua a Master's degree leh Bachelor's degree nei tharte chawimawina hun BNRGSK Building, Kawn Veng Bilkhawthlir ah hman a ni a, Pu H.Rohluna School Education Minister in a hmanpui.

Pu H.Rohluna chuan zirna tellovin hmasawnna tluantling a awm theilo a ni a ti a, zirna tha a awm theih nan School Education Department hmalakna a tawk mailova, khawtlang hruaitute leh nu leh pa te kan tanrual a ngai a ni a ti a. Zirna tha a awm theih nan sorkarin theihtawp a chhuah zel a ni tiin, hemi atan hian national levela zir ang zirlaibu siam a ni a, internal evaluation system te siam a ni a ti a. Zirtirtu indaihlohna sutkian nan zirtirtu Primary Sectionah 100 leh middle sectionah 60 te lak tura peihfel a ni tawh a, science leh mathematics zirtirtu 100 chuang lak turin exam kalpui thuai a ni dawn bawk a ni a ti.

Minister chuan zirlai te note book leh guide book te pawngpaw byheart mai lova, an zirlai te hrethiam tur leh thiamna tak tak nei thei tura taima tur a fuihin, hemi kawngah hian zirtirtu te pawhin zirlaiah thiamna tak tak tuh thei tura tan la turin a fuih bawk a ni. Nu leh pa te bakah khawtlang hruaitute pawh zirlai te tan zirna boruak tha siamsak tur leh zirna tha a awm theih nana veipui tur leh tanlak pui turin a sawm a ni. 

Minister chuan vawiin zirlai titha chawimawi tak te a bikin Lalrinkima, M.Sc (Physics) a MZU a gold medalist chu chhuanawm a tih thu leh a taimakna leh a tumruhna chu entawntlak a ni a ti a. Zirlai te entawn tur dik entawn a, taima taka zirlai zir turin a fuih a ni. Minister chuan zirlai titha te chawimawina chang MZP ten an hria chu lawmawm a tih thu sawiin, MZP sub-headquarters, Bilkhawthlir tanpui nan Rs.10,000/-  a hlan a ni.

Vawiin zirlai ti tha chawimawi te hi Lalrinkima, M.Sc (Physics) a MZU Gold medalist leh Masters' degree ah mi 3 leh bachelors' degree ah mi 9 distinction leh 1st division a pass te an ni.

School Education Minister hi Kolasib district atang DEO, DPC SSA leh DIPRO ten an tawiawm a ni.