Vawiin khan Lawngtlai DC Conference Hall-ah District Bawrhsap Dr A. Muthamma IAS hovin Lawngtlaia kumin Zirtirtute Ni hman dan tur ngaihtuah a ni a. He hunah hian H&TE changtu Parliamentary Secretary Pu H. Zothangliana pawh a tel.
He thut khawmah hian kumin September ni 5-a Zirtirtute Ni (Teachers' Day) hi District pum huapin hmun khatah hman ni se, tih a ni a. He ni a huhova hmanna atan hian Parliamentary Secretary Pu H.Zothangliana chuan MLA Fund atangin cheng singnga a thawh theih dawn thu a sawi a, he ni hi theih ang tawka zirtirtute chawimawina ni atan hman ni se a duh thu a sawi. A huhova hmannaa tel remchang lo an awm a nih pawhin, mahni remchan anga hman tho ni se tiin meeting chuan a rel a. Mahni sikul theuhvah hlung taka hman a nih theih nan ruahmanna siam ni se, an ti bawk.
He meeting-ah hian state leh district council-a sikul lama mawhphurtute bakah, tlawmngai pawl hrang hrang ai awhte an tel a ni.
