School Education Minister Pu H.Rohluna chuan zirtirtu hna hi a zahawmin a pawimawh hle a, thawk tur chuan thiamna nei bik nih a ngaih avangin sokarin training a ngai pawimawh a, IASE leh MZU a B.Ed zirna bakah Aizawl leh Lunglei DIET ah B.Ed zirna hawn tum a ni a, kuminah class tan hman tum a ni, a ti. He thu hi vawiina Maubuang High School building sak thar a hawnna ah a sawi a ni. 

          School Education Minister chuan School hawnna inkhawmah hian zirna hi nu leh paten kan fate kan pek theih tha ber a nih thu sawiin, nu leh paten fate nungchang an hriatchian a pawimawh thu leh zirnaah thahnem an ngai em tihte pawh lo ngaihven a, nu leh pate leh zirtirtute hi zirnaah tanrual a pawimawh thu a sawi a. 

          Minister chuan Mizoram sawrkarin zirnaah sum tam tak seng in, Assembly Budget session-ah pawh School Education budget a san viau zel thu a sawi a. Chuti chung chuan sum indaih lohna avangin kawng thenkhatah duh angin a kal hleih theih loh thu tarlangin, chung zinga lian ber chu zirtirtu indaih lohna anih thu a sawi a. Sorkar chuan sum indaih lohna karah sorkarin zirna a ngaih pawimawh avangin tun atanga rei vak lovah Primary School 100 leh Middle School zirtirtu 60 lak belh a nih tur thu leh, High School Science leh Mathematic zirtirtu 111 lakna tur  MPSC in a buaipui mek thu a sawi a, zirtirtu hi lakbelh ni mah se, lak belh theih hian zirtirtu mamawh a phuhru dawn chuang lo niin a sawi. Minister chuan zirlaite chu midangte elna rilru nei a, mahni zir chin zelah quality nei turin a chah a ni. 

Maubuang High School Building thar hawn tak hi Oil India Ltd-in cheng nuai 15 an pek senga sak a ni a, Class room bakah Headmaster room leh Teachers’ Common Room a awm a ni. Hawnna inkhawmah hian Minister hi Pu K.Laldingliana, Additional Directo,r School Education in a tawiawm a, khawtlang hruaitute, zirtirtute, zirlaite leh nu leh pa engemawzat an kal khawm a ni.