East Tuipui Constituency Bialtu MLA Pu T.Sangkunga chuan nimin ni 24.7.2017 khan a bial chhung khaw 8-a hman tur Oxygen khawl (Oxygen Concentrator) a hlan.

Nimin tlai Khawbung Zawlbuk Tual-a khawl hlanna inkhawm BDO Pu Lalbiakfela kaihhruaiah Bialtu MLA Pu T Sangkunga chuan a bial chhung chu khaw inkârkik tak tak a nih avangin, dam lo na zual, oxygen pek hmanhmawh ngaite leh hmunpui lam pan remchang lote nun chhan a nih theih nan heng oxygen khawlte hi lei a nih thu a sawi a. Bial mipuiten tangkai takin hmang se a duh thu a sawi bawk. Bialtu MLA chuan Bial chhung tana a hmalakna hrang hrang sawiin Tuipuiral tlangdung kawng Champhai atanga Khawbung kaltlangin Tuipui thlenga blacktop-na tur NABARD-ah cheng vaibelchhe 66 beisei a nih thu leh cheng vaibelchhe 15 hna hmahruai thawh nana ruahman a nih phawt thu a sawi a. Bial chhunga sorkar building sak belh leh cheithat chungchanga a hmalakna leh Khawbung Electric Sub-station pawh hawn thuai a nih theih nana a hmalakna te a tarlang bawk a ni.

Oxygen khawl hlanna inkhawmah hian Tuipuiral Group YMA President Pu H. Lalniliana leh Khawbung VCP Pu F Vanlalriana ten lawmthu an sawi bakah Block Congress hruaituten bialtu MLA hi an tawiawm a ni. Oxygen khawl hi East Tuipui South Block-a khaw 4 – Khuangthing, Vaphai, Khankawn, Thekte leh North Block-a khaw 4 – Khuangleng, Leisenzo, Vangchhia, Hruaikawn khawtlang aiawhte hnênah hlan a ni a. Oxygen Concentrator hi BPL Company siam OG 4305 niin BADP Fund hmanga lei a ni.