Vawiin khan Lunglei Circuit House Conference Hall-ah Lunglei District Sports Council (LDSC) General Body Meeting 2015 neih a ni a, Lunglei HPC Vice-Chairman Pu S.Laldingliana chu khuallian niin Meeting hi a hmanpui.

LDSC General Body Meeting an Chairman Pu K.Lalawmpuia kaihhruaiah Pu S.Laldingliana chuan kum 1993 atangin a zawnin term 4 lai LDSC Secretary hna a lo chelh chhungin Sports discipline hrang hranga infiammite hmasawn nan hma an lo lak tawh thin thu a sawi. LDSC chuan infiammite hmakhua ngaiin theihtawp an chhuah zel thin chu a fakawm hle a ni, a ti. Mizoram thalaite vanneihna chu thalai leh infiammi te ngaihsaktu Chief Minister kan nei hi a ni a, Sports Minister viak tha tak leh thalaite hmangaihtu kan la nei deuh deuh hi a vanneihtlak hle a ni, a ti bawk. District dangte neih phak loh Thuamluaia Mual tha tak bakah Mini Sports Complex leh discipline hrang hrangte tan infrastructure tam tak hmuh tur a awmte hi Lunglei mipui vanneihna a ni, a ti a. HPC chuan thalai leh infiammite hmasawn nan Incentive Cash te an sem thin a, hun lo kal zelah pawh Sports discipline hrang hrang tan theihtawp chhuah an inhuam thu a sawi.

Vawiin Meeting-ah khan LDSC chuan HPC Vice-Chairman Pu S.Laldingliana bakah football khawvela Mizoram hming titha Jeje Lalpekhlua leh Lalrindika Ralte leh Refree Zohmingliani te hnenah lawmpuina thilpek an hlan a. Lunglei atanga infiammi Northeast leh a chunglama Medal la infiammi 20 hnenah lawmpuina thuziak leh pawisafai an hlan bawk. Tun dinhmunah hian LDSC hnuaiah hian Sports discipline 26 an intelkhawm a ni.