Vawiin chawhma khan Mizoram State Commission for Women (MSCW) leh National Commission for Women (NCW), New Delhi te tangkawp buatsaih Legal Awareness Programmes on Laws Related to Women chu Synod Conference Centre, Aizawl-ah hman a ni a.  He hunah hian Social Welfare Department Minister Dr.Beichhua chu khuallian niin, MSCW Chairman Pi Lallawmchhungi chuan kaihhruaina hun a hmang.

Khuallian Dr. K.Beichhua chuan hmeichhia te humhalhna kawnga hmalakna hrang hrang zir hona buatsaih tu MSCW Chairman leh a thawhpuite hnenah lawm thu a sawi a. Hmanlai hmeichhiate ngaihdan tamtak Mizo pa ten anneih thin chu tun khawvelah chuan a dik tawh lo a, ram changkang leh hnam changkang tehna hi, society a hmeichhiate dinhmun atanga teh a ni thin a ni, a ti a. Mizo hmeichhia chhuanawm tam tak an awm tawh a, ei leh bar zawnna kawngah leh zirnaa hlawhtlingna nei te hi Mizo mipa aiin hmeichhia ten an ngah zawk a ni, a ti a. Hmeichhiate dinhmun chawikang zel hi sawrkar laipui leh state sawrkar chuan a ngai pawimawh a ni, tiin a sawi a. Mizo hmeichhe dinhmun chawikang lehzual a nih theihnan vawiina kalkhawmte hian legal awareness programme hi hmang tangkai turin leh sawrkar hnenah pawh hmathlir mumal tha zawk thlen tur leh thurawn pe turin a sawm a ni.

Social Welfare Department, Government of Mizoram in POSHAN Abhiyaan Awards, 2018-19  leh Overall ICDS-CAS Implementation Award, 2019 an dawn avangin MSW chuan lawmluina citation a pe a. Hei bakah hian Mizo hmeichhia Chartered Accountant te - Laltluangkimi Chinzah, Jewel Lalthasangzuali leh R.S. Roneihpuii te hnenah chawimawina pek an ni.

MSW hnuaia Legal Cell Member, Dr. P.C. Lalramenga chuan Hmeichhiate Hriselna chungchang sawi hawngin, zirna tawi neih a ni a. Hei bakah hian India Dan Hnuaia Hmeichhiate Chanvo leh Rorelna Court, The Protection of Women from Domestic Violence Act, 2005;  leh The Marriage, Divorce and Inheritance of Property Act, 2014 te zir ho a ni bawk a ni.

He hunah hian Kohhran hrang hrang aiawh hmeichhia hruaitute leh NGO hruaitute an tel a ni.

National Commission for Women hi Ni 13th January, 1992 khan din a ni a. Hmeichhe chungchang India Danpui in a siamdan enpui leh hmeichhe hamthatna leh himna ngaihtuahte,  hmeichhe lungawilohna leh a tul anga puih leh thurawn thunei tute hnena thehluh leh hmeichhe him nana dan zamte chu hman a ni em tin endik te leh a tul anga zirbingna (research) te pawh Commission hian a nei thin ni. Mizoram State Commission for Women hi NCW hnuaia North East Cell hnuaia din a ni.