Vawiin hian Pu Chuauhnuna, Addl DC Serchhip chuan Ministry of Women and Child Development kaltlanga Social Welfare Department te hmalakna pawimawh One Stop Centre chu DC Building chhawng chung berah a hawng.

Pu Chuahnuna chuan, hmeichhia chhungkua leh khawtlanga harsatna bik nei, inhumhimna leh inzirtirna bik mamawh te tana Serchhipa One Stop Centre a lo awm ve ta chu lawmawm a tih thu a sawi a. He ta tlan luh ngai hi chu ngah lo thei ila a duhawm rualin a mamawhtute tan engtiklai pawhin tlan luh theih reng a ni a, hman tangkai tur a ni. Sawrkarin thawktute pawh kokim takin a dah nghal thlap mai a,  a lawmawm hle a ni, a ti.

One Stop Centre hi hmeichhia, tihduhdah tuar (domestic violence) te tana tlanluhna tura duan niin a tul dan ang zelin Centre thawktute hian an lo tanpui thuai (quick response) thin dawn a. FIR thehluh sak te, dan lam lo hrilhhriat te, counselling te leh thil tul apiang an lo umzui sak dawn a ni. Hmeichhe tlan lut te hi a tul angin zan nga thleng he hmunah hian an riak thei dawn a, an fate pawh (mipa an nih chuan kum 8 hnuai lam chu) an riahluh pui thei ang. He mi hun chhung hian a tul ang zelin Centre thawktute hian hma an lakpuiin an tanpui thin dawn a ni.

Serchhip One Stop Centre tur hi tunah P&E Vengah building sak mek a ni a, building peih a nih hma chu vawiina an hawnna hmun DC Office chhawng chung bera room pakhat hi an luah rih dawn a, a mamawhtute tan Phone Number 8415049957 ah leh No. 8974582937 ah te biak theih reng an ni a. Thawktu hi Pi Lalchhanhimi, Administrator leh midang 8, an vaiin mi 9 an awm a ni.