Vawiin chawhma khan Aijal club ah “Literacy and multilingualism” tih thupui a hmangin International Literacy Day, 2019 hman a ni a, Pu Lalchhandama Ralte, Minister, School Education Department chu khuallian niin Pu L Thangmawia, MLA, Vice Chairman, Human Resource Development Board chu Khual zahawm a ni bawk. International Literacy day hman zawh hian Census 2021 hma a Literacy rate a hmasawnna nasa zawk a awm theih nana hmalakna ‘Special Eradication of Illiteracy Project’ (S.E.I.P) sawi hona consultation meeting neih chhunzawm nghal a ni.

Pu Lalchhandama Ralte, Minister, School Education Department chuan,’ Mizoram ah ziak leh chhiar thiam 91.33% kan awm laiin thiam lo 8.67% lai kan la awm a, Adult Education Wing, School Education Department chuan ziak leh chhiar thiam kan pun zel theih nan hma ala reng a ni,’ a ti a,’ Kum 2015 a Departmental survey, School Education Department in a neihnaah ziak leh chhiar thiam lo mi 43,341 kan awm a, hmalakna hrang hrang kalpui a nih hnua zirchianna neih leh aih chuan hengte atang hian ziak leh chhiar thiam mi 7000 vel kan neih belh leh a, mi 36700 vel ziak leh chhiar thiam lo la awm anga ngaih a ni,’ a ti. Minister chuan ziak leh chhiar thiam pawimawhnate sawiin khawtlang leh ram hmasawnna atana hmanraw pawimawh ber a nih thu a sawi a, ziak leh chhiar ngawr ngawr bakah tunlai khawvel changkanna ina a ken tel Digital literacy thlenga inzirtirna neih a tul thu a sawi bawk.  Minister Pu Lalchhandama Ralte chuan,’ Ziak leh chhiar inzirtirna kawnga hmalakna chu School department a thawktute hna chauh ani lova, hmasawnna tak tak nei tur chuan khawtlang leh kohhran hruaitute leh Mizoram a kan NGO hrang hrangte nena thawh hona tha kan neih a hma kan lak tlan a ngai a ni,’ a ti a,’ Kan state hmel a lo mawi zual zel nan Literacy rate a ram pum a pakhatna kan hauh theih nan tan ila tlang ang u,’ a ti bawk.

Vawiin chawhma hun hi Pi Esther Lal Ruatkimi, Commissioner & Secretary, School Education Department in a kaihruaia, Pi Lalzarmawii, Director in Literacy Day chungchang sawina hun hmangin Pu K Laldingliana, Addl. Director in lawmthu sawina hun a hmang bawk a ni.