Mizoram State Anti-Tobacco Day vawi 6-na chu vawiin khan National Tobacco Programme, Lawngtlai District buatsaihin District Hospital Lawngtlai (DHL) OPD building-ah hman a ni a. Day thupui atan "vaihlo leh chuap hriselna" tih hman a ni.

He hun hi DHL-a Medical Officer Dr Paul Lalchungnunga'n a kaihruai a. Khuallian, Lawngtlai Chief Medical Officer (CMO) Dr Lalthlamuana chuan vaihlo leh a kaihhnawih atangin natna tam tak veiin, thihna hial kan tawh phah thin a, kan taksa tana tangkai si lo, tur hlauhawm tak ni zawk si kan tih thin vanga kan tawrhna hi titawp tur leh mahni leh kan bula mite hrisel nan vaihlo leh a kaihhnawih laka inthiar fihlim hi a pawimawh tak zet a ni, a ti a. Meikhu hrim hrim hian natna a thlen nasat avangin mei hmanga sarep ei pawh fimkhur a ngai a ni, a ti. 

Social Worker H. Vanlalmuansangi report atanga a lan danin, kum 2017 April thla atanga kum 2019 September ni 10 thlengin school 121-ah vaihlo leh a kaihhnawih chungchang zirtirna neih a ni tawh a, training vawi 40 neih ni tawhin, tlawmngai pawl leh kohhran te sawmna angin zirtirna pek a nih thin bakah, Anti-Tobacco Squad te'n danin a phal loh vaihlo leh a kaihhnawih zuar leh phal lohna hmuna mei zu vawi 211 an vai tawh a, vaihlo leh a kaihhnawih nghei duh vanga District Hospital-a Tobacco Cessation Clinic pantu mi 1215 an awm tawh bawk.

Vawiina State Anti-Tobacco Day 2019 hmannaah hian District Medical Superintendent Dr Zothanpari Chhakchhuak pawhin thu sawiin, he huna tel zirlai naupangte chu vaihlo leh a kaihhnawih tih chhin loh chu an tan he tur hlauhawm tak laka fihlimna awlsam ber a nih thu a hrilh.