Faina kawnga a thawhhlawk avanga Central Ministry of Jal Shakti Drinking Water & Sanitation Department hnuaia National Award dawngtu Pi Laltharzeli chu nimin tlai khan Mamit lo lutin District Administration ruahmanna-in ropui taka lo hmuah niin a puala inkhawm buatsaih a ni.

Award dawn lawmna hun Mamit Bazar hmuna neihah hian Dr Lalrozama, District Bawrhsap chuan faina kawnga hetiang taka hmalatu Pi Laltharzeli, chawimawina dawn chu ropui a tiin chu aia ropui leh zawk chawimawina a awm a ni tih pawh hre lova, Mamit District kan lo fai lehzual nana a ngaihtuahna sen leh tha a thawhna chu chawimawi leh fak phu a ni a ti. Kan hma lawka khawpui faina kawnga hma kan lak mekah tehfung hrang hranga teh kan nih mai piahlamah fai chu kan bat, changkanna leh hriselna a nih avangin District chhung leh Mamit mipui zawng zawngte faina kawnga tih takzeta hmala turin a sawm a ni. District Bawrhsap hian DC Office aiawhin thilpek a pe bawk a ni.

Award dawngtu Pi Laltharzeli pawhin thusawiin he Award ropui tak dawng tura sulsutpuitu Sawrkar Department hrang hrang, tlawmngai pawl zawng zawngte chungah lawmthu a sawi a, Faina kawnga hma a lakna kawngah lawmman emaw chawimawina emaw a awm dawn tih hresa a nih loh thu sawiin naupang rilru thianghlim inchhunga mawhphurhna thuk tak la neilote hun awl hmang tangkaia faina kawnga hmalakpui chu a rilru ber a nih thu leh an hun kal lehzel tura an thinlunga fai tura inzirna mai piahlamah khawtlang engtik lai pawha kan fai theih nana naupang zawkte hman tangkai chu a tum a nih thu a sawi a, Mamit District leh Mamit khawpui chuan faina hapta kan lo hmang tawh thin a, a hapta chhung maia nasa taka hmalak chu tawk zo mai lova a hriat vanga Children Sanitation Club kaltlanga hmalakna kalpui ta a nih thu a sawi bawk.

Pi Laltharzeli chuan a Award dawn chu Mamit khawtlangin mimal Award ang mai nilova an lo dawnsawnna chu ropui a tih thu sawiin  Award chu Mamit District kan lo fai zual zel theihna atana Mizoram, Mamit District leh Mamit khawpuiin chawimawina a dawn a ni tih kan hriat a, faina kawnga hmalak min tiphurtu a nih theih nana a hlan let thu a sawi bawk a ni.

Pu Lalzawmliana, EE PHED Mamit pawhin thusawiin National Award dawngtu Pi Laltharzeli hmalakna kaltlanga PHE Department Mamit pawh an hmalakna tihchaka a awm thu a sawi a,  ODF 4+1 IEC Category-ah India ram pumah Maharastra State nen a titha ber dinhmun an hauh thu a tarlang bawk.

He hun hi Pu Micky C. Lalfakzuala, President District Village Council Association chuan a kaihruai a, Sawrkar Department aiawh, Tlawmngai pawl hrang hrang aiawh Jt VC, MHIP, MUP, YMA atang ten thusawi ngaihthlak niin Mamit Officer Club President Pu Jacob Lalawmpuia, Addl DC ni bawk chuan chuan thilpek pe-in hei bakah hian pawl hrang hrang aiawhte hian lawmpuina thilpek an pe bawk a. Mamit khawpui chhung mi thahnem tak an tel a ni.

National Award dawngtu Pi Laltharzeli hi Lengpui Airport-ah Sawrkar Department aiawh, Tlawmngai pawl hruaitu aiawhte leh Barzar veng MHIP te bakah Children Sanitation Club aiawhte chuan lo dawngsawngin Mamit thlen hma kawtchhuahah Motor tam tak nen lo hmuah niin, khawchhung fanpui a ni bawk.

Tarlan tak angin Pi Laltharzeli hian faina kawnga a thawhhlawk avanga Award dawng tur hian mahni inpe-in Mamit District chhung thingtlang leh khawpuiah Children Sanitation Club 85 a din tawh a, Mamit Bazar veng bikah hian Children Sanitation Club hi kum 3 chhung lokal pui tawhin kartin vawi 2 hnatlang a neihpui thin a ni.