Vawiin khan Environment & Forests Minister Pu Lalrinmawia Ralte chuan Aizawl Press Club-ah kum 2014 chhunga lehkhabu lehlin tha ber “Pathian Thlamuanna” letlingtu Pu Zothanmawia Khiangte, Mission Vengthlang hnenah Translation Book Award 2014 a hlan. Pathian Thlamuanna tih lehkhabu hi Billy Graham-a ziak “Peace With God” tih lehkhabu lehlin a ni.

Pu Lalrinmawia Ralte chuan hnamdang tawng lehkhabu tha tak tak Mizo mipui nawlpui chhiar theih tura Mizo tawnga letling thin tute fakin an taimakna rah hi mi tam takin an tel a ni, a ti a. Lekhabu letling tur hian hnam dang tawng hriatthiam ringawt a tawk lova, Mizo tawng mawi leh nalh, dik leh fiah taka dahchhuah thiam a ngai a ni, a ti. Minister chuan Mizo ir awm chhuak ngei thu leh hla tha tak tak kan neihte pawh hi hnamdangte chhiar ve theih tura saptawnga lehlin tul hle a a hriat thu sawiin chutiang lama ngaihtuahna seng turin kalkhawmte a sawm a ni.

Mizo Writers’ Association (MWA) Translation Book Award 2014 hi MWA annual meeting neih ruala hlan a ni a. Meeting hi an pawl President Pu R.Lalrawna’n kaihruaiin MWA Secretary Pu R.Lallianzuala, Treasurer Pu C.Lalduhawma leh Translation Book Award Selection Committee Secretary Pu PC Lalrinmawia te hnen atangin report ngaihthlak a ni. He an annual meeting ah hian an member chatuan ram panta Rev.ZT Sangkhuma (15.5.1934 - 22.12.2014) leh Pi Khawlkungi (14.9.1927 - 26.3.2015) sunna hun an hmang nghal a ni.