Sorkar Laipui Union Cabinet-in Immigration & Registration Services chungchanga Foreigners’ Act hnuaiah Dan a siam thar bawhzuiin Ministry of Home Affairs chuan rampumah ‘Mission Mode Project (MMP) on Immigration, Visa and Foreign Registration & Tracking (IVFRT)’ a kalpui tan ta a. Hei hi National e-Governance hnuaia hmalakna chi khat niin vawiin khan Lunglei Circuit House Coference Hall-ah Mizoram sorkara Addl Secretary, Home Dept. Pu Lalbiakzama hovin IVFRT chungchanga zirtirna leh sawihona neih a ni.

‘Workshop on IVFRT Project in Mizoram’ ah hian chawhma lamah Lunglei khawchhunga hotel, toruist lodge, rest/guest house leh sumo counter neitute sawm an ni a, mi 13 an kal a ni. Workshop hawnnaah Pu Lalbiakzama chuan IVFRT MMP hi Bureau of Investigation, Ministry of Home Affairs ruahmanna thar a nih thu a sawi a. Lunglei-ah ramdang mi (foreigner) an lo thlenin, C-Form hmanga register vek tur an nih bakah online-a registration tih vek tur a ni tawh dawn a, hei hian an chetvel leh veivak pawh awlsam taka chhuih theih turin a pui dawn a ni, a ti a. IVFRT kengkawh turin Foreigners’ Regional Registration Office (FRRO) leh Foreigners’ Registration Office (FRO) din a ni dawn a, heng hian foreigner-te thlenna hotel, etc. an endik thin bawk ang. U/s 5 of the Registration of Foreigners Act 1939-in a ngiat angin ramdang mi tupawh India lo lut chuan he Act a bawhchhiat chuan kum khat lungin a tang thei ang a, pawisa cheng sang khat chawi tir tel theih a ni bawk ang. Lunglei khawchhunga mikhual thlenna thin bakah zirna in hrang hrang-a ramdang mi awmte pawh an in register vek a ngai dawn a ni tih a sawi a. IVFRT hi national security khawih thil a nih avangin ngai pawimawh turin a hrilh bawk. Chawhnu lamah Addl Secreatry hian Lunglei khawchhunga zirna in hrang hrang hotute kokhawm lehin IVFRT MMP chungchang a sawipui a ni.

India ramah ramdang mi (foreigner) hna (business/employment) vang leh zinkhual angin an pun chak em avang leh foreigner-te sahimna (foreigner’s safety) leh ramchhung venhimna (national security) atana thil pawimawh tak a nih dawn avangin a he Dan thar hi ruahman a ni a. IVFRT MMP hi centralised online system anga kalpui tur a nih avangin, ramchhung khawi hmunah pawh foreigner lo lut/thleng ta se, he registration hmang hian sorkar laipui hnuaia Home Ministry pawhin an chhui thei dawn a ni. Ramdang mikhual thlenna hotel, dharamshala, mimal in, home-stay, university, hospital leh zirna in hrang hrangte chu he Act hian a huam vek a ni.

IVFRT Mission Mode Project hnuaiah hian 117 Indian Missions abroad, 81 Immigration Check-Posts, 12 FRROs bakah State/District level-ah 716 FROs hawn tum a ni.

Attachment

  • Loading attachment...