Chief Minister Pu Lal Thanhawla chuan ‘sorkar hnathawkte hi a neitu dik tak in ni a, mipuite innghahna leh beisei in ni’ a ti. He thu hi Administrative Training Institute, Mizoram, Aizawl in vawiina Vanapa Hall a  ‘Workshop on Right to Information Act, 2005’ a buatsaiha a sawi a ni.

Chief Minister chuan sorkar tha leh dik, nelawm leh langtlang, lepse ngam siam kan duh a, chumi atana hmanraw pawimawh tak chu RTI Act hman tangkai hi a ni a ti a. RTI Act hi eirukna vengtu a ni a, State Information Commission pawh rei tak kan nei ve tawh a, mahse eirukna vengtu berah eirukna a awm thin tih hriat a ni a, tuna Chief Information Commissioner Pu Lal Dingliana a awm atang chuan a bo tawh a ni a ti a. Hna pawh nasa taka thawkin, hmun kilkhawr zawk thlengin RTI Act pwimawhna mipuite hnenah an tlangaupui thin a, a lawmawm hle a ni a ti a. RTI Act hman tangkaina hian democracy ah inthlakthlengna a thlen thei a ni a ti.

Chief  Minister chuan RTI Act khawihtu te chu an hna baka phurrit pek belhah inngai lo tura chahin, mipui rawngbawltu an nihna hre reng a phur taka thawk turin a fuih a. Tupawhin a thil hriat duh an neihte chu dik tak leh a hun chhung ngeia pe thin turin a ngen bawk a. Hmasawnna nei turin kan zavai hian mawh kan phur a ni tih kan hriat a tha a ti. Sorkarin dan bawhchhana tih tur min phut ang ang hi kan ti mai tur a ni tiin, hei hian mipuite tana mi tangkai leh mipuite zahah kan insiam thei a ni a ti.

Chief Minister chuan MLA Fund te hi DC office in a khawih thin thu sawiin, alo buaipuitu leh khawihtu thenkhatin an mahni tan an lo pawtpeng ve thin tih hriat anih thu a sawi a. Hei hi an tih miah loh tur, sim vat chi a ni a ti.

Khualzahawm Pu Lal Dingliana, Chief Information Commissioner chuan RTI Act chu mipuite tan sorkar dik leh langtlang siam nan leh eiruk venna atan a siam a ni a ti a. He dan hian mipui leh sorkar inkar pawh a pawt hnai nasa hle a ni a ti a. Right tih hian mitin a huam thu sawiin, mi tupawhin RTI Act hmanga sorkara thil hriat duh a neihte chu thudik tak sorkarin a hrilh tur a ni a ti.

Inkhawm kaihruaitu Pu Lalmalsawma, Chief Secretary chuan RTI Act hi sorkar hnathawk ten mipui vantlang tana thawk kan ni tih min hriattirtu a ni tih hi kan hriat fo a tul a ti a. He dan hi sorkar kalphung dan siamah a pawimawh ber pakhat a ni a ti a. Mipuite zawhna kan chhanah thu ziktluak kan hrilh thin lo hi a pawi thei a, kan inenfiah a kan inennawh fo a tul a ni a ti.

Workshop hi chawhnu dar 4 thleng neih a ni a, Pu Vanlalvuana, Dy Director (Adm), ATI, Mizoram in ‘Background and Evolution of RTI in India - Salient Features of RTI Act, 2005’ tih thupui hmangin zirtirna a pe a. RTI Act chungchangah  kalkhawm ten an tawnhriatte leh harsatna awm thin te sawihona an hmang bawk a ni.