Nimin September ni 2 khan New Delhi-a Mizoram House-ah Mizoram Lok Sabha MP Pu C.L. Ruala chuan Pu Lalhmingmawia Ralte lehkhabu ziak “Beyond a teacher’s dream” chu inkhawm tawite buatsaihah a tlangzarh a ni.

Tlangzarhna hun Pu Zorammawia IPS kaihhruaiah hian Lok Sabha MP chuan zirtirtu thawk tha leh hmingtha National Teachers Award hial dawngpha in Award a dawn behchhana lehkhabu a peihfel thei chu a lawmpui thu a sawi a, zirlai, nu leh pa leh mipui mimir tan pawha lehkhabu tangkai tak a nih a duhsak thu a hlan a ni.

He lehkhabu thlirlawkna hun hi Pu Joseph Malsawmtluanga’n a hmanga, lehkhabu ziaktu, kumina National Teacher’s Award hmu Pu Lalhmingmawia Ralte pawhin thu tawi sawiin he hunah hian Delhi-a Mizo awm thahnem tak an tel a ni.