Ni 9 May 2015 (Inrinni) khan Parliamentary Secretary Pu Joseph Lalhimpuia chuan Rev.H. Killuaia lehkhabu ziah pahnih 'Killuaia chawfun' leh 'Killuaia Manna' tih chu BCM Chanmari, Lunglei Sunday School Hall-ah a tlangzarh.

Lehkhabu tlangzarh inkhawm hi Upa C.Sangliana chuan kaihruaiin 'Killuaia Chawfun' sawihawnna hun K.M.S. Dawngliana, Editor 'Kohhran Beng' chuan hmangin, Baptist Higher Secondary School Principal Pu C.Lalhmingmuana chuan 'Killuaia Manna' lehkhabu sawihawna hun a hmang thung. Pu Joseph Lalhimpuia chuan Rev. H. Killuaia chu a mi hriat chian a nih thu leh a tawngkam chhuak pakhat, "Pathianin ni inang min pe theuh a, chumi hmang tangkai tura taima apiangte an ding chhuak thin" a tih thin chu a nun hruaitu pakhat a nih thu a sawi a. Kan ram leh hnam dinchhuahna tur pawhin he thu tho hi a pawimawh a, Mizote hi kan taimak phawt chuan kan dingchhuak dawn a ni, a ti. Thuziak pawimawhna chu tun thlengin a zual zel a ni tiin Pu Joseph Lalhimpuia chuan zirlaite pawhin thil tak tak hre turin lehkha chhiar kan taimak a tul a ni, a ti. Social Media-a thu chi hrang hrang kan hriat te hi a laimu hre turin lehkhabu chhiar a, hriatna khawlkhawm kan chin uar deuh deuh a tul a ni, a ti.

Rev. H. Killuaia hian hla 80 chuang phuah tawhin lehkhabu pawh 20 chuang a lo ziak tawh a. Tun tuma a lehkhabute hi a nun a mellung pawimawh, mahni in chhuahsana kum 50 rawng a bawlna cham puala a buatsaih a nih thu sawiin, "Khawvela ka awm tawhloh hnu pawhin he lehkhabute hian Pathian thutak a la puangzel dawn a ni," a ti.