‘Lehkhabu siama chanchin dah thintute hi hnam tan an hlu a ni,’ Chief Minister Lal Thanhawla chuan a ti. He thu hi vawiina F.Sapbawia ziah ‘ Fanai Chanchin’ tih Aijal Club-ah a tlangzarhna a a sawi a ni.

Chief Minister chuan he lehkhabu hi a tirah chuan hnam chibing thil nia a rin thu sawiin, a han chhiar chian erawh chuan Mizote chanchin a ni tih hriain, tlangzarh tura an sawmna chu tihpuitlin ngei a tum a ni a ti a. Pu Hawla chuan a hnam chibing ang zawnga ngaihtuahna a hman ngailoh thu sawiin, a thiantha leh duhsaktute chu chhungkhatah angai mai thin a ni a ti. Mizote hi chhungkua atanga inzawngchhuak thin kan ni hi a tha hle a ni a ti a. Fanai hi Mizote hnam zinga hnam ropui ber pakhat a ni a ti a. Kan chanchin hi kan chhui thui thei vaklo nia a hriat thu sawiin, kan chhui theih chinah chuan kan chiang viau a ni a ti a. A bua dah thinte phei chu hnam tan an hlu hle a, chhuan lokal leh zel turte tan record tha tak an dah sak a ni a, a ropui hle a ni a ti.

Mizo tawng hi tawng ropui tak a ni a, tunlai thangthar ten duhdah taka an hmang thin chu a ngaimawhawm hle a ni tiin, a hlutna leh a hausaknate hi chhawm nung chho zel turin leh humhalh tlat turin ziakmi leh a hmang tu ten kan vawn nun reng a tul a ni Pu Lal Thanhawla chuan a ti a. Mizo hnahthlak te hi khawiah pawh awm ila chhulkhat kual kan ni tih inhria a, innghirngho lova inngeih taka khawsaho a, harsatna tawh chang pawha Mizoram chu kan Inpui a ni tih hre turin Mizo zawng zawngte chu a chah a. He kan hnam tiderthawngtute apiang chu kan dim dawnlo a ni a ti.

Chief Minister chuan lehkhabu a tlangzarh tak chuan Mizo te history kan hriatchian phah lehzual ngei a beisei thu sawiin, Mizo mipui zawng zawng ten kan hman tangkai ngei theih nan lawm takin a tlangzarh a ni.

Tlangzarh inkhawm hi Pu F.Lalsangliana’n a kaihruai a. Pu F.Hmingthanga’n lehkhabu thlirlawkna a neihah lehkhabu hi Fanai chanchin bil chauh anih loh thu sawiin, Mizote bul leh bal chungchangte, Mizote chenna Mizoramin bul alo tan ve dan te ziahlanna anih thu a tarlang bawk a ni.

Attachment

  • Loading attachment...