Parliamentary Secretary Pu Lal Thanzara chuan Mizo zirlaite chu lehkhathiam hna hmu lo tipungtu Graduate ni mai lo tura fuihin tum mumal tak neia, eizawnna tling ngei zirchhuak turin a chah. He thu hi nizana Bungkawn Branch YMA-in an vengchhunga HSLC leh HSSLC pass thate lawmpuina hun an buatsaihnaa a sawi a ni.

Pu Lal Thanzara chuan tlin leh tlin lo chunga B.A. zir tawk tawk ai chuan, mahni tui leh thiam zawng lama kal a, eizawnna tlak zir chhuah tum hi thil fin thlak zawk a niin, ram changkang zawkte tih dan pawh a ni, a ti. Mizote thlaite chu Vocational lampangah te pawh hawi zau a ngai a, hemi atan hian sorkar chuan hmeichhiate tan Polytechnic a din nual tawh bakah mipa te tan ITI-ah trade hrang hrang 20 lai zir theih turin buatsaih a nih thu a sawi bawk. Sports lama tui te tan pawh sorkar-in hma la zelin, zanah pawh an inkhelh theihna tur eng chak chi (floodlights) Aizawl Sipai Lammual leh Lunglei Thuamluaia Mual-ah vuah mek a nih thu a sawi. Pass tha chawimawi tur kan nih rualin pass ve ta lo te pawh beidawng mai lova, bei nawn zel a hlawhtling ngei tura duhsakna a hlan bawk a ni.

Bungkawn Branch YMA hian kum 2008 atang khan an vengchhung zirlai ti tha te lawmpuina hun an hmang thin a. Kuminah hian HSLC 1st Divn/Distn.-a pass zirlai 20 leh HSSLC 1st Divn./Distn.-a pass zirlai 9 an nei a ni.