Vawiin chawhma a Agriculture Conference Hall-a neih tak Consultative Meeting on Skill Development tih Mizoram Skill Development Society(MSDS) in a buatsaih ah chuan Mizoramah hna zawng mek 50,000 chuang aia tam mah Employment exchange a inziaklut an awm thu sawi lan a ni a. Employment Exhange a inziaklut lo tam tak an la awm thu sawiin in thalai hna hmu lo sing tam tak tan hnatha tak an thawh theih nan MSDS chuan kawng a zawn sak mek thu a tarlang a ni.
He hun hi MSDS Chairman Pu Haukhum Hauzel chuan kaihruaiin meeting a lo tel Consultancy hrang hrang te, Job recruiting agency te, NGO te, labour Union hruaitu te leh Zirlai pawl hruaitu te hnenah Mizoram a thalai tam zawk hna thawhtur nei lo te tan rawihtlaka thiamna pe thei tur Skill Providing Company 8 leh hna pe nghal thei chi company 3 te chu an chah chhuah tur thu a sawi a. Heng Company te hian thalai hnazawngte leh training duhte tan interview na hun March 12 leh 13 khian Assembly annexe building a MSDS huaihawt in Skill Expo cum Job Fair a nei dawn a ni.
Pu Haukhum Hauzel chuan MSDS hi January 24, 2013 khan tum chiang tak nei a din a ni a ti a. Kum 5 chhunga thlai 20,000 leh kum 10 ral hma ngei a thalai 50,000 ten hna thatak, eizawnna tlak an neih theih nana thiamna pek chu MSDS dinchhan leh a tum a nih thu a sawi. Unemployment hi Mizoram mai pawh nilo khawvel pum puia buaipui a ni a. Kan ram bik ah chuan thalai tam tak te hna hmuh loh chhan chu an zirna leh company in rawih tlak a tih thiamna an phut leh beisei te a inmil thin lova, hemi siam tha a, thiamna leh traning pe turin Skill Providers kan tih mai Company tam tak zingah an zirlai chhuakta te hna hmuhsak kawnga hlawhtling bik 8 te hi kan thlang a ni a ti. National Skill Development Corporation(NSDC) chuan "Skill Gap Study of the northeast" a buatsaih a tarlan dan chuan kum 2011-2021 chhunga Mizoram a hna pung tur chu 1.40 lakh a ni a, hemi hun chhunga hna indaih lohna chu 2.42 lakh lai a ni dawn a. Hei hi MSDS chuan a ngai thutak a, he harsatna tih ziaawm nan thalai ziak leh chhiar thiam tawh phawt te tan an traning theih tur siam sak a tum a, hei hi thalai ten phurpui a ngaihven turin an duh a ni a ti.
Thusawitu dang, LE&IT Principal Secretary Pu P.C. Lallawmsanga chuan medical leh technical zirchhuak te zinga 25% vel chauhvin hna an hmu tan tawh a, midang tan phei chuan thiam thil bik te an neih loh chuan hna hmuh a har hle tawh dawn tih a chiang reng mai a. Kan thawh awm tur tawk leh kan tuina ah te chianga, chumi a hlawhtling tur chuan thiamna leh traning tha kan mamawh tawh zawka, qualification ringawt chuan hna a hlawh chhuak thei tawh lo a ni a ti.Kan thalai ten an rilru put hmang leh an hlut zawng te an thlak a hun tawh. Huau huau leh hlimhlawp siamna bawh huk huk tawh lovin Job fair leh education fair te hi ngaihlu tawh zawk sekanzia awm phah a rinawm a ni a ti. Thalai hna hmuh saktu te pawh fimkhur zawkin Company facility leh an intiamkam na ah te chiang tawh se, phai lam leh ram pawna hnathawk tura an thawn ten buaina lian tak tak an tawh thin te a lo zia awm phah ang a ti.
MSDS in thawhpui tura a sawmte chu, TVS,Larsen & Toubro, Jaypee Group,Apollo med Skills ltd,Don Bosco Tech Society, Centum workskill, Apparel training & design Centre(ATDC) leh VLCC te an ni a. Heng Company hrang hrang te training pek hi a hrang theuh hlawm a - Retail hospitality,Cosmetics, engineering&Mechanical, Healthcare, Construction & Apparel,Automobile,Organised Retail, telecom, Forwork carpentry, wielding, plumbing,medical lab technology, operation theatre technology, imagining leh ziak leh chhiar thiam tan a zirtheih tam tak te an ni.
Heng Company 8 te bakah hna pe nghal mai thei tur Reliance, people channel leh Times Job te pawh job fair ah hian sawm an ni.
MSDS chuan hna hmulo zingah lekhathiam sang tak tak an tam thu a tarlang a, hna zawng mek 50,000 zingah hian M.A. 1400 chuang, MSc 300 chuang, Civil & Electrical engineer 170, computer graduate 384 leh a tam ber graduate pangai te an awm a ni.
