Vanduaithlak taka October 31,2014 a Lengpui kawng Tlawng lei leh December 13, 2014-a Darzokai Chhimtuipui lei chim hi Mizoram sawrkar chuan pawi a tiin, heng lei chima thi leh hliamte a tuarpui tak zet a. Heng lei pahnih chim chungchanga thil awmdan chu hetiang hi a ni :-
Tlawng lei: Sihhmui leh Lengpui inkara Bailey Bridge, feet 200 a sei hi kum 2006-2007 khan '24R Class IRC loading'-a dawh a ni a; chumi awmzia chu 24 metric ton a rit motor tlan theihna tur tihna a ni. He thir lei kilhna 'panel pin' leh 'transom clamp' tia vuahte hi an rubo thin a, chuvangin a khat tawka endik reng a niin, kilh that leh thin a ni. May 2014 khan a kilhna 80 bo chu vuah lehin char ngheh (spot welded) an ni a; a hnuah a bo leh avangin July 25, 2014 khan Sairang Police station-ah FIR thehluh a ni a. Tunhnaiah 46 dang a bo tih hriat anih veleh kilh that leh nghal an ni a. A chim hnua endik khan a kilhna bo a lo awm leh nual tih hmuh chhuah a ni.
Tlawng lui leh Lengpui inkar kawng alkatra hmanga siamthatu contractor chuan October 30, 2014 atangin hna a chhunzawm a. Sairang atanga motor lian vawi 9 lai he lei zawhtu chuan phurh phal chin 24 MT anih laiin 35.76 metric ton lai an phur hlawm tih a hnuah hriat a ni a. Lei chim ni 31.10.2014 pawh khan motor lian 31.8 metric ton lai phur chuan vawi 10 lai an zawh hnuah, a vawi 11-na chuan a zawh tliak ta a. A hnua ngun taka chhui chian chuan, phal chin baka rit phur heng motor lian hian an zawh fo (repeated overloading) avang leh lei (bridge) kilhna hriat chhuah leh hma a lo bo leh bawk vanga chim nia ngaih a ni. Phal baka rit phur a motor tlantirtu Contractor lakah hremna lek turin hma lak mek a ni.
Lei chim thir hmanrua chu hlawmin, a chhe thlakna tur hmun dang atanga lakhawmin Krismas hma a zawh ngei tumin November 14,2014 atang khan dawh that hna (launching) tan leh a ni a. Sihhmui lam lui kam atanga nawr tawlin, Lengpui lam kam ah Recovery Van pahnih dahin, pakhatin lehlam atanga rawn nawr phei chu a lo khai a, pakhatin a hnuk tawl bawk a. Recovery van chu an tawlh chet loh nan hnung lamah ban phuna thlun beh an ni bawk a. Khawlin hna an thawh lai chuan thlun nghehna ban phun chu a nghin tak avangin recovery van-in a lei khai chu a thlah dul a. Lei rawn tawlhin Lengpui lam ko kai tura fit 10 chauh a bak tawh laiin, hrui khaina thlah dul duh aia chak a thlah avangin lei hmawr chu a kul zawk a, a rawn let chho leh lam khawlin a khai hman tawh si lova, a kul nawn leh chu December 8,2014 khan vanduaithlak takina chim zui ta mai a. He thil thleng hi khawl thil duh anga khuahkhirh theih loh leh vanduai (accident) vang liau liau niin a lang.
PWD chuan rang taka ruahmanna siam lehin, lei chim chu thiat leh nghalin, dawh tha tura riah chilh nghal a ni a, mawhphurhna hrang hrang insemin a then chu lui chungah nawr tawlh (launch) tan a ni leh mek a. Generator nen inchhawpin, a rang thei ang bera dawh zo turin ngawrh taka hma lak zel a ni.
Darzokai Tuipui lei: Thir hrui lian hmanga lei inkhai (jeepable suspension bridge), metre 200/feet 600 vel laia sei, Sawrkar laipui atanga sum hmuh that loh vang leh chhan hrang hrang avanga zawh lawk loh chu, December 20, 2014 a motor kai theih tura zawh ngei tuma ngawrh taka thawh anih laiin, December 13, 2014 chhun dar 12:45 khan inrin lawk ngaihna awm miah lo leh rinhlelh tur engmah awm lova a lan laiin a chim ta thut mai a. Hna thawktu pakhat thiin, hliam 9 zinga 3 chu Lunglei Civil Hospital leh 1 chu Aizawl Civil Hospital-ah an la awm a. Hnathawk vengtu Police Head Constable Pu F. Lalsawia leh lo thlirpuitu Pu Lalzauva Sailo, Tuipui 'D' chu an hliam na viau nain, nunna atana hlauhawm erawh ni lova ngaih an ni. Hetiang vanduaina rapthlak tak lo thleng hi Mizoram sawrkar chuan pawi a ti em em a, tuartu zawng zawng a tawrhpui tak zet a ni.
A hlim chhawna Bialtu MLA Pu John Siamkunga bakah bialtu PWD SE leh EE ten an tlawh bakah December 16, 2014 khan Er.R.Vanlaltluanga,Engineer-in-Chief leh Er. K.Lalsawmvela, Chief Engineer, Roads chuan a hmunah tlawhin an enfiah leh a. Hmanraw senghawi dan tur te, lei dawh tha leh tura hma lak dan turte ruahmanin, PWD field staff leh Contractor aiawhte hna thawh dan tur an hriattir nghal a. Lei chimta a hmanrua te chu za zela 70 vel hman nawn leh theih tura beisei a ni a. A kilhna phelh veka thiat ngai anih avangin, thiat leh senghawi chhung erawh rei deuh tura ngaih a ni. Contractor S.Guha Niyogi pawhin a rang thei ang bera hna a chhunzawm leh tur thu ralkhat atangin a rawn hrilh bawk. E-in-C chuan khawtlang hruaitute tanpuina ngenin, a tul anga hma lakpui an inhuam thu VCP in a hrilh avangin an lawm hle a ni.
Engineer-ten ngun taka an enfiah hnuah lei khaitu thirhrui (cables) emaw, a pawtnghettu thlunna (anchor block) emaw, thirhrui inbahna steel tower/steel pylon emaw, RCC ban/RCC tower emaw chhia engmah an hmu lova. Thir ban (steel pylon) innghahna (RCC tower base) pakhat erawh chu thir hrui chat hmawrin a vuak keh avangin, tower nen thiata siam that a ngai thung a. RCC Anchor Block atangin dinglam leh veilamah thirhrui lian 4 ve ve inthlungin, khawthlang lama hrui 8 zinga 6 a put a, lui ral chhak lam a mi 8 zinga 4 a put bawk, hei vang hian a chim ta a ni.
Heng lei khaitu thirhrui liante hi anchor block atanga thir lianpui a bat kualin, metar 2.5/fit 8 laia thui invuak thuah chu hmun 4 laia chepbetin nghet taka herh ngheh an ni a. Contractor aiawh Site Engineer chuan 'heng hrui hmawr chelh nghehna hi uluk taka herh ngheh leh endik vek an ni' tih a sawi a. Contractor chuan hmun danga suspension bridge an dawh pawh hetiang baka an tih loh thu a sawi a. Mi tuten emaw an herh thawl anih loh chuan amaha put mai thei nia a ngaih loh thu a sawi bawk. Thirhrui hetizat, fit 8 laia kawih thleh hnua kilh tlat ni bawk, kha leh chen inkhai tawh bawk si, vawi leh khata khati zat put ta phut mai hi thil mak leh vanduai thlak tak a ni a; a put mai theih dan chhan ber pawh hriat thiam har hle niin a hmuna engineer kalte pawhin an hria a ni.
Heng leite hi chim turin emaw, chhe mai turin emaw tuman an duhin an phal lova. Mizoram mipuiten dawh zawh kan thuai nghah hlelh em em laia hetiang rin loh lama chhiatna rapthlak lo thleng hi Sawrkar chuan pawi a ti tak zet a. A rang thei anga dawh tha leh turin theih tawp chhuahin hma a la zui dawn a ni.
