Vawiin zing dar 7:30 am khan Pu Lalsawta, Finance Minister leh Pu C. Ngunlianchunga, Disaster Management & Rehabilitation Minister chuan Armed Veng lei tlahniam hmun an tlawh a. Hetah hian Pu C. Lalpeksanga, Director, DM & R, Pu Lalhmachhuana, Joint Director, Geology, Mining & Mineral Resources Department, Geologist, Geology, Mining & Mineral Resources Department, Lalbiakfela, SDC, DC. Office Aizawl, AIE a Engineer te Media mi leh khawtlang hotuten an tawiawm a ni.
He lei tla hniam hmun hi kum 2002 - 2003 vel atanga che tan tawh niin khang hunlai khan chenna in 80 chuang a khawih chhia a, Sorkarin drain leh check dam te a siam avangin rei tak che lovin a awm a. In leh lo chhia te pawh repair that hlawm niin lungmuang takin an cheng leh mek a. Mahse, check dam an siam hi Gabian Box maia siam a nih avangin a thir te lo tuiekin leh tuilianin a lak zawh avangin tunah hian a hma a a chetna lai tak mi zelin a khi leh ta a ni.
Pu Lalsawta, Finance Minister leh bialtu ni bawk chuan a bial chhunga hetiang harsatna an tawk hi pawi a ti takzet a, Sawrkarin a theih anga ranga hma a lak tur thu a sawi a. Culvert emaw check-dam leh thildang eng pawh thawh tur a awm a nih chuan neitu thinlung pu leh sen belh huam a tha leh tlo tak tura hna thawk tur leh neitu thinlung pu turin khawtlang mipuite a ngen a ni.
Pu C. Ngunlianchunga, Minister, DM & R chuan helai hmun siam that nan hian Concept Paper Rs. 10.00 Crore chuang hret NEC ah thehluh a nih tawh thu leh state priority a dah luh sak a nih theih nan hmalak a tum thu te, Shillong emaw Delhi thleng pawh a umzui turin chak taka hmalak a ni ang a ti a. Hna kan thawh reng reng neitu thinglung pu chunga thawk turin hna thawktute pawh a ngen a. Tuichhe paihna leh luanna mumal tak kan neih theih nan tupawhin hmalak a hun tawh takzet a, chhiat rupna a thlen a in leh lo chan te tan Sorkarin chhawmdawlna a pek theih hi a beitham hle mai a. Chuvangin mipui ten Property Insurance chungchang a kan thanharh a kan neih hlu te tan insure policy lak nachang hre turin mipuite a sawm a ni.
Local Council, khawtlang mipui lo dawngsawngtute chuan Minister ten chak taka thil an bawhzui avang leh a hmun ngei a an harsatna an enpui avangin lawmthu an sawi tak meuh meuh a ni.
