646/2026-2027
Aizawl the 21st May, 2026: Tuna Asia khawthlang lama buaina awm mek avanga Prime Minister in leihriak renchem leh a loa awm theih thila sum hman renchem chungchanga ngenna a lo siam tawh angin, Mizoram Sawrkar chuan he ngenna hi zawma tihlawhtling turin Mizoram Mipui te a ngen a ni.
Mizoram chu State pawn atanga bungraw chaw lut thin kan nih avangin, ram chhunga leihriak man pung leh bungraw phurh man pung hian a nghawng nghal lo thei lo a. Heng te a nih avang hian sawrkar sum renchem kawngah leh heng thil hlu kan neihte vawn chungchangah mipuite a theih ang anga hma la turin Sawrkar chuan mipuite a ngen a ni.
Heng hun chhung hian mahni lirthei hmang lova, a theih anga tam public transport hmang uar tura ngen kan ni a. Lirthei inhman ṭawm pawh a theih ang anga kal pui turin Sawrkar chuan mipuite a chah a. He hun chhung hian tul lova zin chhuah pumpelh hram turin a ngen.
Eirawngbawlna Gas (LPG) te renchem taka hmang tur leh hman loh kara off zel turin a ngen a. Local Bodies, tlawmngai pawl, sumdawng leh Private Institution te pawh he hmalakna hi theih tawpa thlawp turin Sawrkar chuan a ngen bawk.
Mizoram Sawrkar chuan ram mipuite he hun khirh tak kan tawn mek chhung a, sawrkar tha ti chak tur leh ram leh hnam tana, heng ngenna hi tha thlah lo va, a tihhlawhtlin kawnga theih tawp chhuah turin a ngen tak meuh meuh a ni.
